کراچی : شہر قائد میں اینٹی وائلنٹ کرائم سیل (اے وی ایل سی) نے حب چوکی میں کارروائی کرتے ہوئے 4 کار لفٹروں کو حراست میں لے کر مسروقہ گاڑی قبضے میں لے لی۔
تفصیلات کے مطابق اے وی ایل سی کی ٹیم نے حب چیک پوسٹ کے قریب کارروائی کرکے ڈیفنس کے علاقے سے گاڑی چوری کرکے فرار ہونے والے4ملزمان کو گرفتار کرلیا، گرفتار ملزمان بینک سے رقم لے کر نکلنے والوں کو بھی لوٹتے تھے.
اے وی ایل سی حکام کا کہنا ہے کہ ملزمان نے23 جون کو ڈیفنس سے ایک گاڑی چوری کی تھی، ملزمان چوری شدہ گاڑیوں کو چمن میں محمد نامی شخص کو فروخت کرتے ہیں، ملزمان نے11 جون کو زمزمہ اسٹریٹ پر5لاکھ روپے کی ڈکیتی بھی کی تھی۔
گزشتہ روز کراچی کے علاقے فیروز آباد تھانے کی حدود میں گاڑیاں چوری کرکے لانگ ڈرائیو پر نشے کی پارٹیاں کرنے والے خاتون سمیت تین ملزمان کا گروہ گرفتار کرلیا گیا، ملزمان کے قبضے سے اسلحہ اور بڑی تعداد میں منشیات برآمد ہوئی۔
فیروز آباد پولیس نے دوران پٹرولنگ شک کی بنیاد پر ایک ہنڈا سٹی گاڑی کو روکا تو انکشاف ہوا کہ تینوں گاڑی میں سوار ملزمان نشے میں دھت ہیں اور تینوں اس وقت چوری کی گاڑی میں سوار بھی ہیں۔
جس پر فیروز آباد پولیس نے ملزمان کی گاڑی کی تلاشی لی، جس میں ملزمان کے قبضے سے اسلحہ اور آئس سمیت دیگر منشیات برآمد ہوئیں جس کے بعد پولیس نے تینوں ملزمان کو حراست میں لیکر مقدمہ درج کرلیا۔
واضح رہے کہ گزشتہ ماہ کراچی کے علاقے پاور ہاؤس چورنگی کے قریب مبینہ پولیس مقابلے میں 2 ڈاکو ہلاک ہوگئے تھے۔ پولیس کا کہنا تھا کہ گلشن اقبال پولیس کے اہل کار مدعی کے ساتھ ڈاکوؤں کا تعاقب کر رہے تھے.
پاور ہاؤس چورنگی کے قریب پولیس اور ڈاکوؤں میں مقابلہ ہوا، پولیس کے مطابق ملزمان نے ایک پستول راستے میں پھینک دیا تھا، ایک برآمد ہوا۔
