The news is by your side.

Advertisement

چین: کرونا وائرس سے لڑنے والے فرنٹ لائن ورکرز کے لیے اعزازات کا اعلان

بیجنگ: چین میں کرونا وائرس کے خاتمے پر تقریب کا انعقاد کیا گیا جس میں کرونا وائرس سے لڑنے والے فرنٹ لائن ورکرز کے لیے اعزازات کا اعلان کیا گیا، چینی صدر کا کہنا تھا کہ کوئی ملک تنہا وبا سے نہیں نمٹ سکتا۔

بین الاقوامی میڈیا کے مطابق چین میں کرونا وائرس کو شکست دینے پر تقریب کا انعقاد کیا گیا جس میں چینی صدر شی جنگ پنگ نے بھی شرکت کی۔ تقریب میں کرونا وائرس سے لڑنے والے فرنٹ لائن ورکرز کو خراج تحسین پیش کیا گیا جبکہ ان کے لیے اعزازات کا بھی اعلان کیا گیا۔

تقریب میں کرونا وائرس سے جاں بحق افراد کی یاد میں ایک منٹ کی خاموشی بھی اختیار کی گئی۔

تقریب سے خطاب کرتے ہوئے چینی صدر شی جنگ پنگ نے کہا کہ لوگوں کے تحفظ کے لیے ہم سب کچھ کریں گے، وبا کے خلاف پوری طرح کامیابی کے لیے مستقل کوشش کی ضرورت ہے۔

چینی صدر کا کہنا تھا کہ کرونا وائرس کے خلاف جنگ لڑ کر چین نے پھر ذمے دار ہونے کا ثبوت دیا، وائرس دوسرے ممالک میں ابھی بھی پھیل رہا ہے۔

انہوں نے کہا کہ کوئی ملک تنہا وبا سے نہیں نمٹ سکتا۔ کسی بھی ریاست کا خود غرضی میں لیا گیا اقدام پوری دنیا کے لیے خطرہ ہوگا۔

چینی صدر کا کہنا تھا کہ ابتدائی طور پر چین کو وبا پر قابو پانے میں ایک ماہ لگا، 2 ماہ میں ہم نے مقامی سطح پر کیسز کو کم کرنے کے لیے کام کیا۔ چین کی معیشت کرونا وائرس کی وبا کے بعد سب سے پہلے بحال ہوئی۔

انہوں نے مزید کہا کہ دنیا میں دیگر ممالک کے ساتھ مل کر کام کرنے کے لیے پر عزم ہیں۔

Comments

یہ بھی پڑھیں