کراچی : ایس ایس پی کراچی سینٹرل ذیشان صدیقی نے گمشدگی کے بعد ملنے والے بھائی بہن انابیہ اور ایان کے گھر چھوڑنے کی وجہ بتاتے ہوئے کہا خالہ اور نانی کے رویے کے باعث بچوں نے گھر چھوڑا۔
تفصیلات کے مطابق ایس ایس پی کراچی سینٹرل ذیشان صدیقی نے اے آر وائی نیوز کے پروگرام شامِ رمضان میں گفتگو کرتے ہوئے کہا کہ انابیہ اور ایان خالہ اور نانی کے رویے کےباعث خود گھر چھوڑ کر گئے، جس کے بعد اور بچوں نےایک فیملی سےایدھی سینٹرپہنچانے کا کہا۔
ذیشان صدیقی کا کہنا تھا کہ فائیو اسٹارچورنگی سے ایک جوڑا بچوں کو اپنے گھر لے گیا، بچوں کو لے جانے والوں نے ان کی والدہ سے رابطہ کیا۔
ایس ایس پی کراچی سینٹرل نے مزید کہا کہ بچوں نےاپنی دوسری خالہ کے گھر جانے کی خواہش ظاہر کی، بچوں کی خواہش پر رات میں دوسری خالہ کے گھر پہنچا دیا گیا۔
ان کا اس واقعے کے حوالے سے مزید کہنا تھا کہ بچوں کے بیان کے بعد واضح ہوگیا بچے اپنی مرضی سے گئے تھے۔
یاد رہے گذشتہ روز کراچی کے علاقے نارتھ ناظم آباد سے گمشدگی کے بعد بازیابی ہونے والے بچوں کوجوڈیشل مجسٹریٹ کی عدالت میں پیش کیا گیا تھا ، بچوں نے عدالت میں نانی اور خالہ کی جانب سے مار پیٹ اور نامناسب رویے کی شکایت کی۔
بعد ازاں جوڈیشل مجسٹریٹ جہانزیب سومرو نے بچوں کی خواہش پرانہیں دوسری خالہ کے سپرد کرنے کا حکم دیا تھا اور ایان،انابیہ اور ان کی خالہ کے بیرون ملک جانے پر پابندی لگادی تھی۔
