فوربز میگزین کے کم عمر باصلاحیت افراد میں شامل ہونے والی پاکستانی آرٹسٹ عائشہ مبارک نے اپنا مستقبل کا پلان بتادیا۔
تفصیلات کے مطابق عائشہ مبارک علی اے آر وائی نیوز کے پروگرام باخبر سویرا میں خصوصی شرکت کی اور ناسا میں بھیجے گئے اپنے آرٹ ورک سے متعلق ناظرین کو آگاہ کیا۔
عائشہ مبارک علی ایک فائن آرٹسٹ، ویژول آرٹسٹ اور فیشن ڈیزائنر ہونے کے ساتھ ساتھ ڈیجیٹل میڈیم میں کام کرتی ہیں۔
عائشہ نے بتایا کہ میں نئی ٹیکنالوجی پر ریسرچ کرتی رہتی ہوں تاکہ آگاہی حاصل ہوسکے کہ اس وقت تک خلائی تحقیق میں مزید کتنی پیش رفت ہوچکی، مگر بدقسمتی سے بطور پاکستانی ہم خلائی تحقیق میں بہت پیچھے ہیں۔
عائشہ مبارک نے بتایا کہ میں ایک میٹالرجی فرم کے ساتھ منسلک تھی جہاں میں نے ایک پروجیکٹ بنایا، اس میں نیشنل ایروناٹکس اینڈ اسپیس ایڈمنسٹریشن (ناسا) کے سائنسدانوں کے ساتھ تعاون کیا، جولائی 2022 میں میرا آرٹ ورک میلتھ 2 کے لیے اسپیس ایکس کے ذریعے بین الاقوامی خلائی اسٹیشن بھیجا گیا جو کہ راکٹ سی آر ایس 25 کا پارٹ تھا۔
پاکستانی کی پہلی ڈیجیٹل آرٹسٹ نے بتایا کہ اب وہ اپنے نئے پروجیکٹ اسپیس سوٹ پر ریسرچ کررہی ہیں، میری کوشش ہے کہ اسپیس سوٹ کو اس طرح ڈیزائن کرسکوں کہ ہمارا کلچر بھی اس میں نمایاں ہو۔
واضح رہے کہ عائشہ نے تھری ڈی ماڈلنگ اور دھاتوں کا استعمال کر کے فیوژن آرٹ بھی تخلیق کیا، ان کی فیوژن آرٹ پریکٹس کو فوربز مڈل ایسٹ، ای 27، ہیلو اور گرازیا جیسے نامور میگزینز میں بھی نمایاں کیا گیا ہے۔
فوربز میگزین نے حال ہی میں ایک فہرست شائع کی تھی، اس میں 30 سال سے کم عمر باصلاحیت افراد کے نام شامل کرکے ایشیا پیسیفک ریجن میں موجود 20 ممالک اور علاقوں کی نمائندگی کی گئی ہے۔
اس فہرست میں فنکاروں، کھلاڑیوں، سائنسدانوں، کاروباری افراد، کھیلوں اور موسیقاروں، گلوکاروں اور بہت سے ایسے لوگوں کو نمایاں کیا گیا ہے جن کی صلاحیتوں کو اپنے اپنے شعبوں میں مقامی اور بین الاقوامی سطح پر پہچانا جاتا ہے۔
