ڈرامے کی شوٹنگ کے دوران عائزہ خان جلنے سے بال بال بچ گئیں، مذکورہ واقعے کی ویڈیو اداکارہ نے خود سوشل میڈیا پر شیئر کردی۔
اے آر وائی کے ڈرامے ’جان جہاں‘ میں ماہ نور کا مرکزی کردار ادا کرنے والی اداکارہ عائزہ خان سوشل میڈیا پلیٹ فارم انسٹا گرام پر سیٹ سے ایک ویڈیو شیئر کی ہے۔ اس میں وہ جلتی ہوئی چادر کو پھینکی نظر آرہی ہیں جبکہ پیچھے حمزہ علی عباسی بھی کھڑے نظر آرہے ہیں۔
عائزہ جیسے ہی چادر کو پرے پھینکتی ہیں، اس میں سے کپڑے کے جلے ہوئے ٹکر نکل کر زمین پر گرتے ہیں۔ وہ جیسے ہی پیچھے ہٹتی ہیں آگ پر ان کا پاؤں پڑتا ہے مگر خوش قسمتی سے وہ جلنے سے محفوظ رہیں۔
انھوں نے کیپشن میں لکھا کہ اداکار بننا آسان نہیں ہوتا، جب ڈائریکٹر ’ایکشن‘ کہتا ہے تو ہم بھول جاتے ہیں کہ آگے کیا ہونے والا ہے اور صرف اپنی بہترین کارکردگی پیش کرنے کی کوشش کرتے ہیں۔
انھوں نے مزید لکھا کہ کبھی کبھی سیٹ پر غیر متوقع چیزیں بھی پیش آجاتی ہیں جو آن اسکرین ناظرین کو دیکھنے کو نہیں ملتی ہیں۔ لیکن اللہ ہماری حفاظت کر رہا ہے اور میں اللہ کا شکر ادا کرنے سے قاصر ہوں۔
عائزہ خان نے کہا کہ آپ لوگوں کی طرف سے ہمیں جو پذیرائی ملتی ہے وہ بھی بے مثال ہے۔ہمیشہ غیر مشروط طور پر ہماری (اداکاروں) کی حمایت اور محبت کرنے کے لیے آپ سب کا شکریہ۔
View this post on Instagram
واضح رہے کہ اے آر وائی کا ڈرامہ ’جان جہاں‘ آن ایئر ہوچکا ہے، اس میں ناظرین کو حمزہ علی عباسی اور عائزہ خان کی جوڑی کو ایک بار پھر سے اسکرین پر دیکھنے کا موقع مل رہا ہے۔
قابل ذکر بات یہ ہے کہ حمزہ علی عباسی اور عائزہ خان نے 2013 میں اے آر وائی ڈیجیٹل کے بلاک بسٹر ڈرامہ سیریل ’پیارے افضل‘ میں اداکاری کے جوہر دکھائے تھے۔
