اسلام آباد: آزادی مارچ کے شرکا کا ڈی چوک کی طرف مارچ کا امکان ہے جس کے پیش نظر انتظامیہ نے بلیوایریا میں ایف سی اور پولیس کی بھاری نفری تعینات کردی۔
ذرائع کے مطابق شرکا کی پیش قدمی کے پیش نظر انتظامیہ نے تمام علاقوں سے نفری ڈی چوک بلیو ایریا تعینات کرنےکافیصلہ کیا جس کے بعد ایف سی اور پولیس کی بھاری نفری کو طلب کرلیا گیا۔
انتظامیہ کا کہنا ہے کہ ہم کسی بھی صورتحال سے نمٹنے کے لیے پوری طرح تیار ہیں، بلیو ایریا اور ڈی چوک کے اطراف رینجرز، ایلیٹ فورس کی مزید نفری بھی تعینات کی جارہی ہے۔
وزارتِ داخلہ کے حکام کے مطابق پارلیمنٹ ہاؤس کے سامنے بکتر بند گاڑیاں بھی پہنچا دی گئیں جبکہ حساس علاقے میں مزید نفری کو بھی طلب کرلیا گیا۔
یاد رہے کہ گزشتہ روز معاونِ خصوصی برائے اطلاعات فردوس عاشق اعوان کا کہنا تھا کہ مظاہرین کی جانب سے کسی بھی اقدام کی صورت میں حکومت ردعمل دے گی، اگر قانون کے دائرے میں احتجاج ہوا تو کسی کو کچھ نہیں کہا جائے گا۔
