راولپنڈی: قومی ٹیسٹ کرکٹ ٹیم کے کپتان اظہر علی نے کہا ہے کہ سری لنکن ٹیم کو آسان نہیں لیا جاسکتا، ان کی بولنگ اور بیٹنگ اچھی ہے۔
تفصیلات کے مطابق قومی ٹیسٹ کرکٹ ٹیم کے کپتان اظہر علی نے سری لنکن کپتان کے ہمراہ مشترکہ پریس کانفرنس کرتے ہوئے کہا کہ ہوم گراؤنڈ پر کھیل رہے ہیں پوری کوشش کریں گے کہ جو کمی ہے اسے دور کریں۔
اظہر علی نے کہا کہ خوشی ہے 10 سال بعد ٹیسٹ کرکٹ پاکستان میں واپس آئی ہے اور گراؤنڈز کی رونقیں بحال ہوئیں، آسٹریلیا میں ہم اچھی کارکردگی نہیں دکھا سکے اب ہوم گراؤنڈ پر پوری کوشش کریں گے کہ اچھا کھیل پیش کریں۔
Osaka Batteries Cup #PAKvSL Test series 2019 trophy unveiling ceremony pic.twitter.com/uwnPDLVpom
— Pakistan Cricket (@TheRealPCB) December 10, 2019
اظہر علی نے کہا کہ کوشش کررہا ہوں کہ اپنی فارم بحال کرکے بڑا اسکور کروں، کپتان اچھا پرفارم کرے تو دیگر کھلاڑیوں کو بھی حوصلہ ہوتا ہے، پریشر کو ہینڈل کرنے کی کوشش کرنا ہوگی۔
ایک سوال کے جواب میں اظہر علی نے کہا کہ سری لنکن ٹیم کو آسان نہیں لیا جاسکتا ہے ان کی بولنگ اور بیٹنگ اچھی ہے۔
دوسری جانب سری لنکن ٹیم کے کپتان ڈی مووتھ کرونا رتنے نے کہا کہ پاکستان کے دورے پر بہت خوش ہیں، دس سال بعد آئے ہیں اچھا موقع ہے سیریز جیتنے کی کوشش کریں گے۔
کرونا رتنے نے کہا کہ مکی آرتھر پہلے پاکستان کے کوچ تھے اب ہمارے ساتھ ہیں، ان کے ساتھ ٹریننگ کرکے پاکستان کی ٹیم کو جاننے کا موقع ملا ہے، کوشش کریں گے اچھا پرفارم کریں۔
