پاکستان کرکٹ بورڈ کو ٹیم کے لیے اسسٹنٹ کوچ کی تلاش ہے اور معلوم ہوا ہے کہ سابق ٹیسٹ کرکٹر اظہر محمود اس عہدے کے لیے مضبوط امیدوار ہیں۔
پاکستان کرکٹ بورڈ نے وائٹ بال اور ریڈ بال کرکٹ فارمیٹس کے لیے الگ الگ ہیڈ کوچز کی تقرری کا فیصلہ کیا ہے تاہم اسسٹنٹ کوچ کی بھی تقرری کی جائے گی۔
اس سلسلے میں پی سی بی کی جانب سے اسسٹنٹ کوچ کی تلاش کے لیے اشتہار بھی دیا گیا تھا جس میں درخواستیں جمع کرانے کی آخری تاریخ 20 اپریل ہے۔
ذرائع کا کہنا ہے کہ پاکستان کے سابق آل راؤنڈر اظہر محمود وائٹ بال اور ریڈ بال کرکٹ کے اسسٹنٹ کوچ ہوں گے اور اس کا اعلان 20 اپریل کے بعد ہی کیا جائے گا۔
اظہر محمود اس سے قبل بھی پاکستان کرکٹ ٹیم کے بولنگ کوچ رہ چکے ہیں، وہ پی ایس ایل کی فاتح اسلام آباد یونائیٹڈ کے اس وقت بولنگ کوچ ہیں۔
وائٹ بال کے ہیڈ کوچ کے لیے گیری کرسٹن اور ریڈ بال کے ہیڈ کوچ کے لیے جیسن گلیسپی کے ساتھ معاملات طے پا چکے ہیں اور ان کے ناموں کا اعلان بھی 15 اپریل کے بعد متوقع ہے۔
