19 دسمبر 2005ء کو پاکستان ٹیلی وژن کی مایہ ناز اداکار عذرا شیروانی امریکا میں وفات پاگئی تھیں۔ پی ٹی وی کے یادگار ڈراموں میں عذرا شیروانی کے کردار ناظرین میں بے حد مقبول ہوئے۔ آج ماضی کی اسی مقبول اداکارہ کی برسی ہے۔
ماضی میں جھانکیں تو پی ٹی وی کے ڈرامے اور مختلف پروگرام اس شوق سے دیکھے جاتے تھے کہ لوگ ہر کام چھوڑ کر اپنے گھروں میں ٹیلی ویژن اسکرین کے سامنے بیٹھ جاتے تھے۔ ٹی وی پر تفریحی پروگرام نشر ہوتے تو شہر کی سڑکیں ویران ہوجایا کرتی تھیں۔ عذرا شیروانی ٹی وی کے اسی سنہرے عہد میں اسکرین پر یوں ‘ڈرامہ’ کرتی تھیں کہ ان کے کرداروں پر حقیقت کا گمان ہوتا تھا۔ وہ اپنے وقت کے مقبول ترین ڈرامے انکل عرفی میں غازی آپا بنیں تو تنہایاں میں سخت گیر آپا بیگم کے روپ میں دکھائی دیں۔ مقبولیت کا ریکارڈ قائم کرنے والے ڈرامے دھوپ کنارے میں انھوں فضیلت کا کردار ادا کر کے ناظرین کو محظوظ کیا۔
تنہائیاں حسینہ معین کا تحریر کردہ وہ ڈرامہ تھا جس میں آپا بیگم کا کردار بلاشبہ عذرا شیروانی کے کیریئر کا سب سے بہترین اور مشہور کردار تھا۔ اس ڈرامے میں جمشید انصاری کے کردار کے ساتھ ان کے مکالمے بہت پسند کیے گئے۔
آنگن ٹیڑھا میں انھوں نے مرکزی کردار محبوب احمد (اداکار شکیل) کی ساس عرف سلیہ بیگم کا کردار نہایت خوبی سے ادا کیا۔ عذرا شیروانی نے اپنے وقت کے ایک اور مقبول کھیل ستارہ اور مہرالنّساء میں بھی ماں کا کردار نبھایا تھا۔ انا، افشاں، گھر اک نگر جیسے ڈراموں میں بھی ان کی پرفارمنس کو بہت سراہا گیا تھا۔
اس زمانے میں لاہور اور کراچی میں ٹی وی اسٹیشنوں کے درمیان معیاری ڈرامے اور شان دار پرفارمنس سے ناظرین کے دل جیتنے کے لیے گویا ایک دوڑ لگی رہتی تھی۔ عذرا شیروانی نے اسی زمانے میں اپنی فن کارانہ صلاحیتوں کا لوہا منوایا۔
1940ء کو متحدہ ہندوستان کے شہر میرٹھ میں پیدا ہونے والی عذرا شیروانی نے 35 سال تک شوبزنس سے تعلق جوڑے رکھا جس میں اپنے معیاری کام اور شان دار پرفارمنس کی بدولت نہ شہرت اور مقبولیت حاصل کی بلکہ لوگوں کا بہت سا پیار بھی سمیٹا۔ وہ ایک عرصے سے امریکا میں اپنے بیٹے کے ساتھ رہ رہی تھیں۔ انھیں امریکا ہی میں سپردِ خاک کیا گیا۔
