چمن : پاکستان اور افغانستان کی سیکیورٹی فورسز کے درمیان پانچویں فلیگ میٹنگ میں 18 اگست سے بند باب دوستی کھولنے کا فیصلہ کر لیا گیا ہے۔
تفصیلات کے مطابق پانچویں گلیگ میٹنگ کار گر ثابت ہوئی جس میں افغانستان کی سیکیورٹی فورسز نے پاکستان کے دو ٹوک موقف کے آگے گھٹنے ٹیکتے ہوئے باقاعدہ معافی مانگ لی جس کے بعد کل سے باب دوستی کھول دیا جائے گا۔
ذرائع کے مطابق پاکستان اورافغانستان کی سکیورٹی فورسز کے درمیان ہونے والی پانچویں فلیگ میٹنگ میں افغان حکام کی جانب سے 18 اگست کو پیش آنے والے واقعے پر باقاعدہ طور پر تحریری معافی مانگی گئی۔
اسی سے متعلق : مودی مخالف مظاہروں پر باب دوستی پراشتعال انگیزی، باب دوستی بند
فلیگ میٹنگ کے دوران افغان وفد کے سربراہ لیفٹیننٹ کرنل محمد چنگیز نے کہا کہ 18 اگست کا واقعہ نا قابل برداشت ہے جس کی مذمت کرتے ہیں اوراس افسوسناک واقعے میں ملوث افراد کو کیفر کردار تک پہنچائیں گے۔
افغانستان کے باقاعدہ معافی مانگنے کے بعد فلیگ میٹنگ میں فیصلہ کیا گیا کہ کل سے باب دوستی کو کھول دیا جائے گا اورآئندہ دونوں ملکوں کی فورسز کے اجلاس میں ہرماہ فلیگ میٹنگ کے انعقاد کو یقینی بنایا جائے گا جب کہ پاک افغان بارڈرپرہاٹ لائن بھی قائم کی جائے گی تاکہ آئندہ ایسا واقعہ پیش نہ آسکے۔
یہ بھی پڑھیں : پاک افغان بارڈر،باب دوستی 13ویں روز بھی بند
واضح رہے کہ 18 اگست کو افغانستان کے شہریوں کی جانب سے اپنی حدود میں انڈیا کے حق میں پاکستان مخالف مظاہرہ کیا گیا تھا جس کا افغان فورسز نے کوئی ایکشن نہیں لیا۔
افغانستان کے شہریوں نے احتجاج کے دوران باب دوستی پر پتھراؤ بھی کیا اور پاکستانی پرچم کو نذر آتش بھی کیا جس کے بعد پاکستانی سکیورٹی فورسز نے باب دوستی بند کردیا تھا۔
خیلا رہے کہ افسوسناک واقعہ پیش آنے پر وزیر اعظم نواز شریف نے حکم دیا تھا کہ جب تک افغانستان باقاعدہ طور پر معافی نہیں مانگ لیتا باب دوستی نہ کھولا جائے۔
