اسلام آباد: وزیر اعظم عمران خان نے بابر اعوان سے ملاقات کے دوران کہا کہ بعض عناصر ملک کو آگے بڑھتا نہیں دیکھنا چاہتے، جمہوری عمل میں رخنہ ڈالنے والوں کا ہر حربہ ناکام ہوگا۔
تفصیلات کے مطابق وزیر اعظم عمران خان سے بابر اعوان کی اہم ملاقات ہوئی۔ ملاقات میں وزیر اعظم کے ممنوعہ فنڈنگ کیس پر تفصیلی مشاورت کی گئی۔
بابر اعوان نے وزیر اعظم کو کیس سے متعلق قانونی و آئینی نکات پر بریفنگ دی۔ بابر اعوان کا کہنا تھا کہ تحریک انصاف الیکشن کمیشن میں سارا مالی حساب کتاب جمع کروا چکی ہے۔ پارٹی کے کھاتوں کا مسلسل آڈٹ بھی کروایا جاتا رہا ہے۔
ذرائع کے مطابق ویر اعظم نے کہا کہ اپوزیشن کی بڑی سیاسی جماعتوں نے خود منی لانڈرنگ کی۔ دونوں جماعتوں نے منی لانڈرنگ کے لیے ممنوعہ فنڈنگ کا استعمال کیا۔
انہوں نے کہا کہ جمہوریت اور مععیشت پٹڑی کے دونوں پہیے ہیں جو مستحکم ہو رہے ہیں، بعض عناصر ملک کو آگے بڑھتا نہیں دیکھنا چاہتے۔ جمہوری عمل میں رخنہ ڈالنے والوں کا ہر حربہ ناکام ہوگا۔
بابر اعوان نے کہا کہ جو وزیر اعظم اپنے خرچے پر گھر میں رہتا ہے اسے بیرونی فنڈنگ کی ضرورت نہیں، بیرونی فنڈنگ کی ضرورت فالودے والے جعلی اکاؤنٹس رکھنے والوں کو تھی۔
انہوں نے کہا کہ کیس سے متعلق تمام تفصیلات الیکشن کمیشن کے پاس موجود ہیں، اپوزیشن کا ممنوعہ فنڈنگ سے متعلق پروپیگنڈا ناکام ہوگا۔ تحریک انصاف اس کیس کی قانونی کارروائی میں بھی سرخرو ہوگی۔
