اسلام آباد: اسپیکر قومی اسمبلی ایاز صادق کی جانب سے تحریک انصاف کے سربراہ عمران خان خلاف ریفرنس کیس میں بابراعوان کا کہنا ہے کہ ریفرنس زائد المعیاد ہوچکا‘ کارروائی ممکن نہیں ہے۔
قومی اسمبلی کے اسپیکر کی جانب سے عمران خان کے خلاف 5ستمبرکو ریفرنس الیکشن کمیشن میں بھیجا گیا تھا، الیکشن کمیشن 90 دن کے اندر ریفرنس پرفیصلہ کرنے کا پابند ہے.
تفصیلات کے مطابق الیکشن کمیشن میں زیرالتواء ریفرنس کے خلاف ہائی کورٹ میں درخواست کی سماعت ہوئی ،کیس کی سماعت چیف جسٹس انورخان کاسی نے کی، تحریک انصاف کے چیئرمین عمران خان کی جانب سے بابراعوان عدالت میں پیش ہوئے جبکہ حکومت کی جانب سے سےڈپٹی اٹارنی جنرل فضل الرحمان عدالت میں پیش ہوئے.
اس موقع پر بابراعوان کا کہنا تھا کہ قانون کے مطابق جب آئینی مسئلہ ہو تو لارجربینچ تشکیل دیا جاتا ہے، انتہائی اہم اورآئینی مسئلہ ہے ، سنگل بینچ نے رٹ پٹیشن کومنظورنہیں کیا، دائرریفرنس زائد المیعاد ہونے پرالیکشن کمیشن سماعت نہیں کرسکتا ہے.
مزید پڑھیں:نااہلی ریفرنس: عمران خان کے وکیل نے ریفرنس ناقابل سماعت قرار دے دیا
انہوں نے کہا کہ الیکشن کمیشن 90 دن کے اندر ریفرنس پرفیصلہ کرنے کا پابند ہے،5ستمبرکو ایازصادق نے ریفرنس الیکشن کمیشن کو بھیجا تھا، انہوں نے کہا کہ 90دن مکمل ہونے کےبعد الیکشن کمیشن سماعت نہیں کر سکتا ہے.
ڈپٹی اٹارنی جنرل نے کہا کہ ایک دن کا وقت دیں‘ میں عدالت کی معاونت کرنے کو تیارہوں،عدالت نےڈپٹی اٹارنی جنرل کی استدعا منظور کرلی ، بعد ازاں اسلام آباد ہائی کورٹ نےکیس کی سماعت کل تک ملتوی کردی۔
