پاکستان کرکٹ بورڈ نے بابر اعظم کے سر پر ایک بار پھر ٹی ٹوئنٹی اور ون ڈے ٹیم کی قیادت کا تاج سر پر سجا دیا ہے۔
اے آر وائی نیوز کے مطابق بابر اعظم جنہوں نے ایشیا اور ورلڈ کپ میں ٹیم کی ناقص پرفارمنس کے عبد گزشتہ سال نومبر میں تینوں فارمیٹ کی قیادت چھوڑ دی تھی تاہم بورڈ منیجمنٹ تبدیل ہوتے ہی انہیں ایک بار پھر قومی ٹیم کی قیادت سونپ دی گئی ہے۔
بتایا جا رہا ہے کہ بابر اعظم نے دوبارہ کپتان بننے کے لیے تینوں فارمیٹ کی قیادت سونپنے کی شرط رکھی تھی تاہم گزشتہ شام پی سی بی وفد جن میں نئی سلیکشن کمیٹی کے اراکین بھی شامل تھے نے کاکول اکیڈمی ایبٹ آباد میں فٹنس کیمپ میں مصروف قومی کھلاڑیوں اور بابر اعظم سے بات کی اور انہیں دونوں فارمیٹ کی قیادت لینے پر قائل کیا۔
بابر اعظم کی رضامندی ظاہر کرنے کے بعد پاکستان کرکٹ بورڈ نے آج سوشل میڈیا سائٹ ایکس پر اپنے آفیشل اکاؤنٹ کے ذریعے انہیں ٹی ٹوئنٹی اور ون ڈے ٹیم کا کپتان مقرر کرنے کا اعلان کیا ہے۔
پریس ریلیز میں کہا گیا ہے کہ سلیکشن کمیٹی نے مشاورت کے بعد متفقہ طور پر بابر اعظم کو ٹی ٹوئنٹی اور ون ڈے فارمیٹ کا کپتان مقرر کیا ہے۔
واضح رہے کہ بابر اعظم نے گزشتہ سال 15 نومبر کو تینوں فارمیٹ کی قیادت سے استعفیٰ دے دیا تھا جس کے بعد پی سی بی منیجمنٹ کمیٹی کے اس وقت کے سربراہ ذکا اشرف نے شاہین شاہ کو ٹی ٹوئنٹی اور شان مسعود کو ٹیسٹ کرکٹ کا کپتان مقرر کیا تھا تاہم منیجمنٹ بدلنے کے ساتھ ہی فیصلوں کو ریورس گیئر لگ گیا۔
تاہم شاہین شاہ کو صرف ایک سیریز میں ہی قومی ٹیم کی قیادت کا موقع مل سکا۔ نیوزی لینڈ میں چار ایک سے ٹی ٹوئنٹی سیریز ہارنے کے بعد پی ایس ایل 9 میں بحیثیت کپتان لاہور قلندرز کی شرمناک کارکردگی کے بعد انہیں قیادت سے ہٹائے جانے کی باتیں گردش کرنے لگی تھیں۔
گزشتہ دنوں بابر اعظم نے چیئرمین پی سی بی محسن نقوی سے بھی ملاقات کی تھی جہاں ذرائع کے مطابق انہیں باضابطہ قیادت دوبارہ سونپنے کی پیشکش کی گئی تھی۔
