کراچی: ایم کیو ایم رہنما و سابق وزیر بابر غوری کو پولیس کی جانب سے عدالتی احکامات کے بغیر رہا کیے جانے کا انکشاف ہوا ہے۔
اے آر وائی نیوز کے مطابق سندھ ہائیکورٹ میں بابر غوری کی درخواست پر سماعت ہوئی، عدالت میں وزارت داخلہ، ایف آئی اے، پولیس کی جانب سے رپورٹ جمع کروائی گئی۔
دوران سماعت سرکاری وکیل نے موقف اختیار کیا کہ ’تفتیشی افسر کو اختیار نہیں تھا کہ وہ بابر غوری کو شخصی ضمانت پر رہا کرے۔
واضح رہے کہ پولیس نے سائٹ سپرہائی وے تھانے میں درج مقدمہ سی کلاس کرنے کی رپورٹ جمع کروائی تھی۔
بابر غوری کے خلاف 7 کیسز کو این آر او کے تحت واپس لیا گیا، پولیس رپورٹ
دوسری جانب پولیس رپورٹ میں کہا گیا ہے کہ ڈسٹرکٹ سینٹرل کے مختلف تھانوں میں بابر غوری کے خلاف 7 مقدمات 1995 سے درج ہیں، ان کے خلاف 2015 میں اشتعال انگیز تقاریر کا مقدمہ بھی درج کیا گیا تھا جبکہ ان کے 7 کیسز کو این آر او کے تحت واپس لے لیا گیا تھا۔
’بابر غوری کو عدم شواہد کی بنیاد پر اشتعال انگیز تقریر کیس میں بے قصور قرار دیا گیا ہے کیس میں عدالت نے پولیس رپورٹ پر تاحال کوئی احکامات جاری نہیں کیے۔‘
رپورٹ میں بتایا گیا کہ انسداد دہشت گردی کی عدالت نے پولیس رپورٹ پر تاحال کوئی فیصلہ نہیں کیا، ان کے خلاف 10 کیسز زیر سماعت ہیں جبکہ 15 مقدمات واپس لیے گئے ہیں۔
پورٹ قاسم میں غیرقانونی بھرتیوں اور پلاٹ الاٹمنٹ کی انکوائری جاری ہے، نیب
نیب نے اپنی رپورٹ میں کہا کہ ’پورٹ قاسم میں غیرقانونی بھرتیوں اور پلاٹ الاٹمنٹ کی انکوائری جاری ہے جبکہ بابر غوری کے خلاف منی لانڈرنگ کا کیس اے ٹی سی اسلام آباد میں زیر سماعت ہے۔
مزید پڑھیں: اشتعال انگیز تقریر میں معاونت کا الزام: ایم کیو ایم رہنما بابر غوری بے گناہ قرار
واضح رہے کہ سائٹ سپر ہائی وے تھانے کے کیس میں رہا ہونے کے بعد بابر غوری ملک سے باہر چلے گئے تھے۔
