بچے انسان کے ہوں یا جانور کے، شرارتیں کرنا ان کی جبلت میں شامل ہوتا ہے، ان کی معصوم شرارتوں کو دیکھ کر ہی ہم محظوظ ہوتے ہیں۔
سماجی رابطے کی ویب سائٹ ٹوئٹر پر ایک ایسی ہی ویڈیو وائرل ہورہی ہے کہ جس میں ایک ہاتھی کے بچے کی معصومانہ شرارت کے منظر کو قید کرلیا گیا۔
عام طور پر دیکھا گیا ہے کہ ہاتھی انتہائی ذہین مخلوق ہیں اور وہ انسانوں کے ساتھ غیرمعمولی طور پر دوستانہ رویہ بھی رکھتے ہیں، خاص طور پر ان کی دیکھ بھال کرنے والے مہاوت سے ان کو خاص انسیت ہوتی ہے۔
سوشل میڈیا یر وائرل ہونے والی میں اس ویڈیو میں ایک ہاتھی کے بچے اور اس کے رکھوالے کے درمیان ہونے والی دلچسپ صورتحال کی منظر کشی کی گئی ہے جسے دیکھ کر آپ مسکرائے بغیر نہیں رہ سکیں گے۔
Hey! That’s my bed..get up..😠 pic.twitter.com/WX4IaROsvp
— Dr.Samrat Gowda IFS (@IfsSamrat) May 10, 2022
یہ ویڈیو بھارتی جنگلات کے افسر ڈاکٹر سمرت گوڈا کے ٹویٹر اکاؤنٹ سے شیئر کی گئی ہے جو مائیکرو بلاگنگ ویب سائٹ پر جانوروں کی دل دہلا دینے والی ویڈیوز شیئر کرنے کے لیے مشہور ہیں۔
اس ویڈیو کا کیپشن بھی بہت دلچسپ ہے کہ "یہ میرا بستر ہے یہاں سے اٹھو” ویڈیو کلپ کا آغاز ہاتھی کے بچے کے ساتھ ہوتا ہے جو اپنی بھاری جسامت کے باوجود لکڑی کی باڑ کو عبور کرنے کے لیے جدوجہد کر رہا ہے جس کیلئے وہ تھوڑی سی جدوجہد کے بعد کامیاب ہوجاتا ہے۔
باڑ سے نکلنے کے بعد وہ سیدھا اس مقام پر جاتا ہے جہاں چڑیا گھر کا چوکیدار ایک گدے پر لیٹا سو رہا ہوتا ہے، ہاتھی کا بچہ اس کو جگانے کی ہر ممکن کوشش کرتا ہے۔
لیکن چوکیدار بظاہر سونے کی ایکٹنگ کرتے ہوئے لاتعلقی کا مظاہرہ کرتا ہے جس پر بچہ ناراضگی کا اظہار کرتے ہوئے اپنا منہ جھاڑیوں میں دبا لیتا ہے۔
چوکیدار اسے اپنے گدے پر ساتھ لٹانے کیلئے جگہ دینے کی کوشش بھی کرتا ہے لیکن وہ نہیں مانتا۔ تاہم کچھ دیر بعد وہ اپنے اس دوست کے ساتھ فوم کے گدے پر لیٹ جاتا ہے۔
ہاتھی کے بچے اور مہاوت کے درمیان ہونے والی نوک جھونک کی دلچسپ ویڈیو کو مائیکرو بلاگنگ ویب سائٹ پر 1.82 لاکھ سے زیادہ ویوز 12,500لائکس اور 2,800 سے زیادہ ری ٹویٹس ملے ہیں۔