The news is by your side.

Advertisement

باڑے سے 8 سالہ بچی کی نعش برآمد، سرکاری اسپتال سے نومولود بچی اغواء

کراچی : سکھن سے ملنے والی8سالہ لائبہ کی لاش پوسٹ مارٹم کیلئے جناح اسپتال منتقل کردی گئی، کھوکھراپار میں سرکاری اسپتال سے نومولود بچی کے اغواء کا مقدمہ درج کرلیا گیا۔

تفصیلات کے مطابق کراچی کے علاقے سکھن تھانے حدود میں واقع بھینسوں کے باڑے کے اندر پانی کے ٹینک سے ملنے والی بچی کی لاش کو پوسٹ مارٹم کیلئے جناح اسپتال منتقل کردیا گیا۔

اس حوالے سے مقتولہ بچی کے اہل خانہ کا کہنا ہے کہ ہفتے کی شام چار بجے لائبہ اپنے بھائی کے ساتھ دودھ لینے باڑے گئی تھی، بھائی واپس آگیا لیکن بچی لائبہ واپس نہیں آئی۔

اہل خانہ نے میڈیا سے گفتگو میں بتایا کہ کافی تلاش کرنے کے بعد باڑے سے دودھ کا برتن ملا، اغوا کا شک ہوا تو تھانے میں نامعلوم افراد کے خلاف مقدمہ درج کرایا۔

اہلخانہ کے مطابق آج بچی کی لاش باڑے کے اندر پانی کے ٹینک سے ملی، بچی کے چچا کا کہنا تھا کہ لائبہ کی لاش بوری میں تھی جس کے ساتھ پتھر بندھا ہوا تھا۔

دوسری جانب کھوکھراپار میں واقع سرکاری اسپتال سے نومولود بچی کےاغوا کا واقعہ پیش آیا ہے، بچی کے اغوا کا مقدمہ والد کی مدعیت میں کھوکھراپار تھانے میں درج کرادیا گیا۔

پولیس کے مطابق اہل خانہ نے بتایا ہے کہ بچی کو اس کی والدہ نے خود دوسری خاتون کے حوالے کیا، مبینہ اغوا کار خاتون نے بچی کی والدہ کو آکراپنا تعارف کرایا، بچی کی والدہ نے مبینہ اغواکار کو نقاب اتارنے کا کہا۔

اہلخانہ کے مطابق مبینہ اغوا کارنے جان پہچان ظاہر کی اور بچی گود میں لے کر بیٹھ گئی، والدہ نے جیسے ہی آنکھیں بند کیں ،مبینہ اغوا کاربچی لے کرفرار ہوگئی۔

پولیس کا کہنا ہے کہ مبینہ اغوا کار خاتون اور بچی کی والدہ ایک دوسرے کو جانتی ہیں، واقعے کا مقدمہ درج کرلیا ہے مزید تفتیش جاری ہے۔

Comments

یہ بھی پڑھیں