لاہور : معمولی تلخ کلامی پانچ ماہ کی معصوم بچی کی ہلاکت کا سبب بن گئی، سفاک والد اور پھوپا نے بچی کو چھت سے پھینک دیا، پولیس نے دونوں ملزمان کو گرفتار کرکے مقدمہ درج کرلیا۔
تفصیلات کے مطابق لاہور کے علاقے فیکٹری ایریا والٹن میں5ماہ کی بچی کے والد سنی پطرس اور پھوپا نے معمولی سی بات پر بچی کی ماں سے رنجش کے باعث بچی کو قتل کردیا۔
اس حوالے سے پولیس کا کہنا ہے کہ بچی کی والدہ نے رپورٹ درج کرائی ہے جس میں کہا ہے کہ بچی کا پھوپا گھر آیا تو اس دوران میری بیٹی اسے دیکھ کر روپڑی میں نے اتنا کہا کہ آپ کی وجہ سے روئی ہے۔
جس پر وہ طیش میں آگیا اور اس بات پر میرے شوہر سنی پطرس اور بچی کے پھوپا نے بیٹی کو چھت سے نیچے پھینک دیا۔ جس کے بعد وہ موقع پر ہی جاں بحق ہوگئی۔
پولیس نے مقتولہ بچی کی ماں کی مدعیت میں مقدمہ درج کرلیا ہے اور بچی کے والد اور پھوپا کو گرفتارکرلیا گیا ہے۔
بعد ازاں مقدمے میں نامزد ملزم سنی پطرس کی اہلیہ اور ملزم نوید کے بھائی نے پولیس کو بیان دیا ہے، مقتولہ کی والدہ اور ملزم کی اہلیہ نے بتایا ہے کہ میرا شوہرسنی پطرس نشے میں تھا۔
بچی میرے شوہر کے ہاتھ سے گلی میں گر گئی تھی، ہم نے خود سنی پطرس کی گرفتاری کرائی ہے، نوید کے بھائی ندیم کا الزام ہے کہ بچی گری تو والد گلی میں کھڑا تھا۔
