کراچی : باچا خان انٹرنیشنل ایئرپورٹ پشاور کا جدید انٹرنیشنل ارائیول لاؤنج مسافروں کیلئے کھول دیا گیا،بیرون ملک سے پشاور پہنچنے والے مسافروں کو سی اے اے، ایف آئی اے اور اے ایس ایف کے افسران نے استقبال کیا۔
تفصیلات کے مطابق پشاور ائیرپورٹ حکام کے مطابق پشاور ایئرپورٹ کے ارائیول لاؤنج کو دور جدید کے مطابق تعمیر کیا گیا ہے، بین الاقوامی آمد لاؤنج پر دو بورڈنگ برجز بھی نصب کیے گئے ہیں۔
مسافروں کی سہولت کیلئے دو خودکار زینے اور تین لفٹیں بھی لگائی گئی ہیں، اس حوالے سے سول ایوی ایشن ترجمان کا کہنا ہے کہ باچا خان انٹر نیشنل ایئرپورٹ کو ساڑھے تین ارب روپے کی لاگت سے تعمیر کیا گیا ہے۔
بیرون ملک سے آنے والے مسافروں کے لئے امیگریشن کاؤنٹرز میں اضافہ کیا گیا ہے، دوسری جانب بیرون ملک سے آنے والے مسافروں سمیت مسافروں کو لے کر جانے والے رشتہ داروں کو شدید مشکلات کا سامنا ہے۔ ان کا کہنا تھا ائیر پورٹ پر سہولیات تو موجود ہیں تاہم گاڑیوں کی پارکنگ کا مسلۂ تاحال حل نہیں ہو سکا۔
