کمر کا درد دیگر تکالیف کی عام اقسام میں سے ایک ہے، 80 فیصد بالغ افراد اپنی زندگی کے کسی نہ کسی حصے میں اس کمر درد کا سامنا کرتے ہیں جس کی وجوہات مختلف ہوتی ہیں۔
اے آر وائی نیوز کے پروگرام باخبر سویرا میں یوگا تھراپسٹ عائشہ خان نے کمر کے درد سے نجات کیلئے مؤثر اور کارآمد طریقے بیان کیے جو اس درد سے متاثرہ افراد کیلئے بےحد مفید ہیں۔
انہوں نے بتایا کہ کئی وجوہات کی بنا پر بیٹھنے یا جھکنے سے آپ کی کمر میں درد ہو سکتا ہے، یہ وجوہات مختلف ہو سکتی ہیں، کمر کے درد کی شدت اور ان پوزیشنوں پر منحصر ہے جن میں آپ خود کو رکھتے ہیں، کچھ معاملات میں، لوگ کمر کے نچلے حصے میں درد اور تکلیف کی وجہ سے اٹھنے بیٹھنے سے قاصر ہو سکتے ہیں۔
عائشہ خان نے کہا کہ اکثر گاڑی چلاتے ہوئے یا بیٹھنے اور جھکنے پر کمر کے نچلے حصے میں درد کسی بھی شخص کے طرز زندگی پر برا اثر ڈال سکتا ہے اور روز مرہ کے کاموں کو انجام دینے میں رکاوٹ کا باعث بھی ہے۔
ان کا کہنا تھا کہ گاڑی چلاتے ہوئے زیادہ تر زور ڈرائیور کی کمر پر پڑتا ہے، لہٰذا کوشش کرنی چاہیے کہ کار چلائیں یا موٹر سائیکل کمر کو بلکل سیدھا رکھیں، اس موقع پر انہوں نے کچھ کارآمد ورزشیں بھی بتائیں۔
