وزیراعلیٰ سندھ مراد علی شاہ کی زیر صدارت کابینہ اجلاس میں 20 اور 25 سال پرانی گاڑیوں سے متعلق سخت فیصلہ کیا گیا ہے۔
اے آر وائی نیوز کے مطابق وزیراعلیٰ سندھ مراد علی شاہ کی زیر صدارت کابینہ کا اجلاس ہوا جس میں مختلف نوعیت کے کئی اہم فیصلے کیے گئے۔ کابینہ نے نادرا کے ساتھ بایومیٹرک تصدیق کے معاہدے کی منظوری بھی دی۔
ترجمان وزیراعلیٰ سندھ کے جاری بیان میں کہا گیا ہے کہ صوبائی کابینہ نے ٹریفک قوانین میں اہم ترامیم کی منظوری دی ہے۔ اب بھاری گاڑیوں پر 0.5 فیصد رجسٹریشن فیس اور ایک ہزار سالانہ ٹیکس عائد ہوگا۔ کمرشل گاڑیوں کے لیے فٹنس سرٹیفکیٹ لازم ہو گا اور غیر فٹ کمرشل گاڑیوں پر 10 ہزار روپے جرمانہ عائد کیا جائے گا۔
سندھ کابینہ نے 20 سال پرانی گاڑیوں پر بین الصوبائی اور 25 سال پرانی گاڑیوں پر بین الاضلاعی پابندی عائد کرنے کی منظوری دینے کے ساتھ غیر معیار رکشا اور لوڈر گاڑیوں پر بھی مکمل پابندی لگانے کا فیصلہ کیا گیا۔ جب کہ کالے شیشوں پر بار بار خلاف ورزی پر 3 لاکھ تک جرمانہ لگایا جائے گا۔
ہیوی ٹرانسپورٹ ڈرائیونگ لائسنس کے لیے 30 گھنٹے کی تربیت لازمی قرار دیتے ہوئے ایچ ٹی وی لائسنس کی عمر کی حد 24 سے کم کر کے 22 سال کر دی گئی۔
سندھ کابینہ میں ٹریفک سے متعلق مقدمات جلد نمٹانے کے لیے خصوصی ٹریفک عدالتیں قائم کرنے کا فیصلہ کیا گیا۔ اس کے علاوہ کراچی میں 3 انسداد منشیات عدالت اور دیگر شہروں میں ایک ایک عدالت قائم کرنے کی منظوری بھی دی۔
اجلاس میں سندھ حکومت کی جانب سے خصوصی افراد کے لیے انکلوژو سٹی کے قیام کا اعلان کرتے ہوئے بتایا گیا کہ اس سلسلے میں کورنگی میں 88.38 ایکڑ زمین پر خصوصی شہر تعمیر ہوگا۔ اس انکلوژو سٹی میں خصوصی افراد کی بحالی، تعلیم اور سبزہ زار کی سہولتیں میسر ہوں گی۔
سندھ کابینہ نے نادرا کے ساتھ بایو میٹرک تصدیق کے معاہدے کی منظوری دیدی۔ پر تصدیق پر 10 روپے پلس ٹیکس فیس بھی مقرر کی گئی۔
اجلاس سے خطاب کرتے ہوئے وزیر اعلیٰ سندھ مراد علی شاہ نے شرکا کو بتایا کہ سیلاب متاثرین کے گھروں کی تعمیر اور آیس آئی یو ٹی ماڈل پراجیکٹس بن چکے ہیں۔وفاق نےسندھ حکومت کو دیگر صوبوں میں منصوبوں کے لیے 9 ارب روپے دیے ہیں۔
انہوں نے بتایا کہ رحیم یار خان اور راولپنڈی میں ایس آئی یو ٹی اسپتال سندھ حکومت قائم کرےگی۔ رحیم یار خان میں اس منصوبے کے لیے 2 ارب جب کہ پنڈی کے لیے ایک ارب روپے مختص کیے گئے ہیں۔
