ایک بادشاہ اپنے چند خاص مصاحبوں کے ساتھ شکار کے لیے نکلا۔ جاڑوں کے دن تھے، وہ سب دور نکل گئے اور اسی اثناء میں رات سر پر آ گئی۔
اندھیرا بڑھنے لگا اور بادشاہ اور اس کے مصاحبوں کو واپسی کا راستہ سجھائی نہیں دے رہا تھا۔ وہ کسی امید کے ساتھ آگے بڑھ رہے تھے کہ بادشاہ کو ایک مکان نظر آیا۔ یہ کسی کسان کا گھر تھا۔ بادشاہ نے کہا کہ آج رات وہ اس کسان کے گھر میں قیام کرے گا تاکہ سردی کے اثر سے بچ جائے۔
مزید سبق آموز اور دل چسپ کہانیاں پڑھنے کے لیے یہاں کلک کریں
ایک وزیر نے یہ سنا تو کہا کہ یہ بات بادشاہ کے بلند مرتبہ کے لائق نہیں ہے کہ ایک کسان سے رہنے کی جگہ مانگے۔ ہم اسی جگہ خیمے لگا دیں گے اور آگ جلائیں گے تاکہ کھانا بھی تیار کرا لیں۔ کسان کو بادشاہ کے قافلے کی خبر ہو گئی۔ اس کے یہاں جو کچھ کھانے کے لیے موجود تھا وہ لا کر بادشاہ کے سامنے پیش کر دیا اور آداب بجا لایا اور کہا کہ بادشاہ سلامت آج رات میرے گھر گزاریں تو مجھ غریب پر احسان ہوگا۔ وزیر نے پھر مداخلت کی اور اپنی بات دہرائی تو کسان نے ادب سے کہا کہ حضور اس سے آپ بلند مرتبہ ہرگز کم نہ ہوگا لیکن شاید لوگ نہیں چاہتے کہ ایک کسان کی عزت بڑھ جائے۔
بادشاہ کو کسان کی یہ بات بہت پسند آئی۔ اس نے حکم دیا کہ رات کو اس کا قیام کسان کے گھر ہوگا اور یہ کہہ کر کھانا کھانے لگا۔ کسان کی خوشی کا عالم ہی اور تھا۔ بادشاہ نے صبح کو رخصت ہوتے وقت اسے انعام دیا۔ لوگوں نے دیکھا کہ وہ کسان کچھ دور تک بادشاہ کی سواری کے ساتھ ساتھ چلتا رہا اور کہتا جاتا تھا کہ بادشاہ نے ایک کسان کے گھر قیام کیا، مگر بادشاہ کی عزت اور بڑائی میں کوئی کمی نہیں ہوئی لیکن بلند مرتبہ بادشاہ کی مہربانی کا سایہ کسان کے سر پڑا تو اس کا سر آسمان کی بلندی تک جا پہنچا۔
(گلستانِ سعدی سے ایک حکایت)
