بہاولپور : پنجاب کے شہر بہاولپور میں ایک ہی خاندان کے 5 افراد کے قتل کا مقدمہ درج کرلیا گیا ، مقتولین کا پوسٹ مارٹم آج کیا جائے گا۔
تفصیلات کے مطابق بہاولپور میں ایک ہی خاندان کے پانچ افراد کے قتل کامقدمہ درج کرلیا گیا، مقدمہ تھانہ سمہ سٹہ میں مقتول کاشف کے بھائی کی مدعیت میں درج کیا گیا۔
پولیس نے مقدمہ درج کرکے تفتیش کا دائرہ کار مزید بڑھا کر مختلف زاویوں سے شواہد اکھٹے کرنے شروع کردیئے ہیں۔
اسپتال ذرائع کا کہنا ہے کہ لاشیں سرد خانے منتقل کردی گئی ہیں، مقتولین کا پوسٹ مارٹم آج کیا جائے گا۔
گزشتہ روز ماڈل ایونیو کے گھر سے ایک ہی فیملی کے ہانچ افراد کی لاشیں برآمد ہوئی تھیں، لاشوں کے پاس ہی ایک پسٹل بھی برآمد ہوا تھا۔
کاشف نامی شخص اس کی بیوی عروج اور دوبچوں کو سر میں فائر مار کر قتل کیا گیا تھا اور ایک بیٹے کو گلہ دبا کر قتل کیا گیا جبکہ مقتول کی چارسالہ بیٹی بے ہوشی کی حالت میں ملی تھی۔
آئی جی پنجاب عثمان انور نے بھی افسوسناک واقعے کا نوٹس لیتے ہوئے ڈی پی او اسد سرفراز سے چوبیس گھنٹوں میں ملزمان کی گرفتاری کو یقینی بناتے ہوئے رپورٹ طلب کی تھی۔
