بہاولپور میں چار روز قبل شوہر کی بیوی اور تین بچوں کو قتل کرنے کی دل دہلادینے والی تفصیلات سامنے آگئی۔
تفصیلات کے مطابق 3دسمبر کو بہاولپور کی ایک نجی ہاؤسنگ کالونی کے ایک گھر سے ایک ہی خاندان کے پانچ افراد کی لاشیں ملی تھیں، ہلاک ہونے والوں میں میاں بیوی اور اُن کے تین بیٹے شامل تھے جبکہ ایک چار سال کی بچی زندہ ملی تھی، ان تمام لوگوں کا قتل کاشف نے کیا اور بعد میں خودکشی کرلی۔
بہاولپور پولیس کے مطابق واقعے کے روز بچے اسکول نہیں گئے تھے، کاشف نے نشہ آور دوا دودھ میں ملا کر بچوں کو دی، کاشف بلوچ نے بے ہوش ہونے پر ایک بیٹے کو منہ پر تکیہ رکھ کر قتل کیا، چار سالہ تسمیہ کو تکیے سے مارنے کی کوشش کی، وہ بیہوش ہوئی تو ملزم نے مردہ سمجھا، دونوں بڑے بیٹوں اور بیوی نے بے ہوشی کے باوجود مزاحمت کی تو گولیاں مار کر قتل کیا۔
حکام نے بتایا کہ ملزم نے بیوی بچوں کو قتل کرکے خودکشی کی، گھر سے نشہ آور گولیوں کے ریپر برآمد ہوئے ہیں، ملزم کاشف بلوچ نے گولی کی آواز دبانے کیلئے تکیے اور کپڑوں کا استعمال کیا۔
پولیس کا کہنا ہے کہ بچ جانے والی 4 سالہ تسمیہ نے بھی پولیس کو حقائق بتا دیئے، ملزم کاشف بلوچ کے فنگر پرنٹ بھی ملنے والے پستول سے میچ کر گئے ہیں، ملزم نے بیوی بچوں کو کس بنا پر قتل کیا تاحال معمہ حل نہ ہوسکا۔
واضح رہے کہ مرنے والوں میں 40 سالہ کاشف اور ان کی 36 سالہ اہلیہ سمیت 15 اور 13 برس کے دو بیٹے اور ایک نو سالہ بیٹا بھی شامل ہیں۔
