دبئی : بحرین کی اولمپک کمیٹی (اے این او سی) قطر میں زیر حراست باڈی بلڈر سمیع الحداد کی رہائی کے لئے کوشاں ہے، الحداد کو سمندری حدود کی خلاف ورزی پر قطری حکام نے حراست میں لیا تھا۔
تفصیلات کے مطابق بحرینی اولمپک کمیٹی نے قطر میں زیرحراست اپنے باڈی بلڈر سمیع الحداد کی رہائی کے لیے کوششیں تیز کردی ہیں۔
اس حوالے سے عرب نیوز نے بحرین کی سرکاری نیوز ایجنسی کے حوالے سے بتایا ہے کہ الحداد کو رواں سال کے آغاز پر آٹھ جنوری کو اس وقت حراست میں لیا گیا جب وہ بحرین کی سمندری حدود میں مچھلیاں پکڑ رہے تھے۔
اتوار کو بحرین نے قطر کے کوسٹ گارڈز کی جانب سے باڈی بلڈر سمیع الحداد کی ساتھیوں سمیت گرفتاری کی مذمت کرتے ہوئے کہا تھا کہ قطر نے الحداد اور بحرین کے مچھیروں پر قطری سمندری حدود کی خلاف ورزی کے الزامات عائد کیے ہیں۔
واضح رہے کہ باڈی بلڈر چیمپیئن سمیع الحداد نے سال 2016 میں انٹرنیشنل فیڈریشن آف باڈی بلڈنگ اینڈ فٹنس (آئی ایف بی بی) موزولانی پرو کلاسیک اور2018میں ہونے والے آئی ایف بی بی پروسپین مقابلے میں گولڈ میڈل حاصل کیا تھا۔
