راولپنڈی: آرمی چیف آف اسٹاف نے مردم اور خانہ شماری کے سیکیورٹی پلان کی منظوری دے دی، 2 لاکھ جوان مردم شماری کے دوران سیکیورٹی کے فرائض انجام دیں گے۔
پاک فوج کے تعلقاتِ عامہ کے ڈائریکٹر جنرل نے سماجی رابطے کی ویب سائٹ کے ذریعے ایک ٹوئٹ میں کہا کہ آرمی چیف آف اسٹاف جنرل قمر باجوہ نے مردم اور خانہ شماری کے درمیان امن و امان کو برقرار رکھنے کے لیے پلان کی منظوری دے دی۔
#COAS approves plan to support conduct of 6th Population & Housing Census. Upto 200,000 troops will be emp while cont other security resps.
— Maj Gen Asif Ghafoor (@OfficialDGISPR) January 27, 2017
ڈی جی آئی ایس پی آر کے مطابق پاک فوج کے دولاکھ جوان مردم اور خانہ شماری کے دوران پورے ملک میں ٹیموں کے ساتھ اپنے فرائض سرانجام دیں گے۔ خیال رہے مردم شماری کا آغاز 15 مارچ سے کیا جائے گا، جو مرحلہ وار ہوگا۔
یاد رہے کہ پاکستان میں آخری بار مردم اور خانہ شماری 1998 میں کی گئی تھی تاہم طویل وقفے کے بعد سپریم کورٹ نے نوٹس لیتے ہوئے حکومت وقت کو مردم شماری کرنے کی ہدایت جاری کیں۔ ایک محتاط اندازے کے مطابق پاکستان کی آبادی اس وقت 20 کروڑ سے تجاوز کرچکی ہے۔
