دہی بڑے ماہ رمضان کے دوران افطار کا جزو خاص ہے، آج آپ کو عام دہی بڑوں کی جگہ بیک کیے ہوئے دہی بڑے بنانے کی ترکیب بتائی جارہی ہے۔
اجزا
بیکنگ پاؤڈر: 1 کھانے کا چمچ
نمک: 1 چائے کا چمچ
ہری مرچ: 2 چائے کے چمچ کٹی ہوئی
زیتون کا تیل: حسب ضرورت
دہی: 1 پاؤ
زیرہ: 2 کھانے کے چمچ بھنا اور پسا ہوا
ثابت دھنیہ: 2 کھانے کے چمچ بھنا اور پسا ہوا
چاٹ مصالحہ: حسب ضرورت
پودینے کا پتہ: گارنش کے لیے
لال مرچ ثابت: گارنش کے لیے
ترکیب
سب سے پہلے بلینڈر میں تھوڑا سا پانی اور ماش کی دال ڈال کر اچھی طرح بلینڈ کرلیں۔
اب اس میں بیکنگ پاؤڈر اور تھوڑا سا پانی شامل کر کے ایک بار پھر آدھے منٹ کے لیے بلینڈ کرلیں۔
پھر اس میں نمک اور ایک چائے کا چمچ ہری مرچ ڈال کر پھر بلینڈ کرلیں۔
اب بیکنگ ٹرے کو زیتون کے تیل سے گریس کر کے بلینڈ کیے ہوئے مکسچر کو بیکنگ ٹرے میں نکال کر بیک کرلیں۔
ایک پیالے میں دہی کو 5 کھانے کے چمچ پانی کے ساتھ پھینٹ لیں۔
پھر اس میں آدھا چائے کا چمچ ہری مرچ، زیرہ اور دھنیہ ڈال کر اچھی طرح مکس کریں۔
بڑوں کو اوون سے نکال کر ٹکڑوں میں کاٹ لیں۔
اب ان پر دہی مکسچر ڈال کر چاٹ مصالحہ اور باقی آدھا چائے کا چمچ ہری مرچیں چھڑکیں۔
پودینے کے پتے اور ثابت لال مرچ سے گارنش کر کے سرو کریں۔
