کوئٹہ: وزیر اعلیٰ بلوچستان سرفراز بگٹی نے گورنمنٹ پوسٹ گریجویٹ سائنس کالج کو براہ راست اپنی سرپرستی میں لینے اور کالج کے لیے ایک ارب کی خصوصی گرانٹ کا اعلان کیا ہے۔
تفصیلات کے مطابق وزیر اعلیٰ بلوچستان سرفراز بگٹی نے گورنمنٹ پوسٹ گریجویٹ سائنس کالج کوئٹہ کا دورہ کیا، اور آتش زدگی سے متاثرہ کالج کا مرمت و بحالی کے بعد افتتاح کیا، انھوں نے کہا سائنس کالج میں جدید آئی ٹی پارک تعمیر کیا جائے گا۔
سرفراز بگٹی کا کہنا تھا کہ کسی کو نوکری فروخت نہیں کرنے دینے کی بات پر قائم ہیں، محکمہ تعلیم میں مقامی سطح پر میرٹ پر بھرتیاں کی گئیں، بہت سے شعبوں میں اصلاحات کی اشد ضرورت ہے۔
نوجوانوں کو تعلیم کے ذریعے مثبت سمت میں آگے بڑھانے کی ضرورت ہے، والدین اور تعلیمی ماہرین نئی نسل کو مثبت سرگرمیوں کی جانب راغب کریں، دشمن عناصر نوجوانوں کو خودکش حملہ آور بنانے کی طرف راغب کر رہے ہیں، ریاست مخالف پروپیگنڈا کرنے والے عناصر پر کڑی نظر ہے اور اس کے مصدقہ ثبوت موجود ہیں۔
انھوں نے کہا بیڈ گورننس کی آڑ میں ریاست کو برا بھلا نہیں کہا جا سکتا، حکومت ترقی اور تعلیم کے مواقع پر سنجیدہ اقدامات کر رہی ہے، نوجوانوں کو آکسفورڈ، ہارورڈ سمیت دنیا بھر کی ممتاز جامعات میں تعلیم کے لیے بھیج رہے ہیں، جب کہ ریاست مخالف عناصر نوجوانوں کو خود کش جیکٹ پہنا رہے ہیں، قانون کی چھٹی سمسٹر کی طالبہ کو خود کش جیکٹ پہنائی گئی۔
کالعدم بلوچ لبریشن فرنٹ سے تعلق رکھنے والا انتہائی مطلوب ملزم گرفتار
وزیر اعلیٰ نے کہا بلوچستان کی غیر متوازن ترقی کو بنیاد بنا کر پروپیگنڈا کیا جا رہا ہے، غیر متوازن ترقی پورے پاکستان کا مسئلہ ہے، جو ترقی کراچی میں ہے وہ کشمور میں نہیں ہے، جو ترقی قلعہ سیف اللہ میں ہے وہ سرند جوگیزئی میں نہیں ہے، جو ترقی لاہور میں ہے وہ ڈیرہ غازی خان میں نہیں۔
انھوں نے کہا محکمہ زکوٰة سالانہ 30 کروڑ تقسیم کرتا ہے، اور حکومت اس محکمے پر 1 ارب 60 کروڑ خرچ کرتی ہے، زکوٰة کی رقم ڈپٹی کمشنرز بھی تقسیم کر سکتے ہیں۔
