بالٹی مور : امریکی ریاست میری لینڈ میں گزشتہ روز ہونے والے خوفناک حادثے میں ہلاک ہونے والے افراد مزدور تھے جن کی لاشیں تاحال نہ مل سکیں۔
تفصیلات کے مطابق امریکی شہر بالٹی مور کے مشہور زمانہ پل کے افوسناک حادثے میں 6افراد کی ہلاکت کی تصدیق کی گئی ہے جس کی لاشیں سمندر سے تاحال برآمد نہیں کی جاسکیں۔
امریکی کوسٹ گارڈ نے ریسکیو اور تلاشی مہم ختم کردی اور لاپتہ 6 افراد کو مردہ قرار دے دیا گیا ہے، حادثے کے وقت یہ بدنصیب افراد پل کی مرمت میں مصروف تھے اور جہاز کے ٹکرانے سے گہرے سمندر میں گر گئے تھے۔
اس حوالے سے امریکی کوسٹ گارڈ حکام کا کہنا ہے کہ جیسے جیسے وقت گزر رہا تھا ریسکیو آپریشن مشکل ہوتا جا رہا تھا۔
ایک عہدیدار نے بتایا کہ پانی کے درجہ حرارت اور تیرتے ملبے کی وجہ سے تلاشی مہم کا عمل کافی مشکل ہوگیا تھا۔
یاد رہے کہ گزشتہ روز بالٹی مور کے مشہور پُل ’فرانسس اسکاٹکی برج‘ سے سنگاپور کا ایک کارگو شپ ٹکرانے کے باعث پل زوردار دھماکے سے ٹوٹ گیا تھا۔
حادثے کے نتیجے میں پل کا بڑا حصہ ٹوٹ کر دریا میں جاگرا جبکہ مال بردار بحری جہاز میں بھی آگ لگ گئی۔
