حکومت سندھ نے 90 روز کے لیے صوبے بھر میں اسلحہ کی نمائش پر پابندی عائد کرتے ہوئے پابندی کا نوٹیفکیشن جاری کر دیا ہے۔
اے آر وائی نیوز کے مطابق حکومت سندھ نے 90 روز کے لیے صوبے بھر میں اسلحہ کی نمائش پر پابندی عائد کر دی ہے قانون نافذ کرنے والے ادارے اس سے مستثنیٰ ہوں گے۔
اس حوالے سے جاری نوٹیفکیشن کے مطابق اسلحہ کی نمائش پر پابندی سے رجسٹرڈ پرائیویٹ سیکیورٹی کمپنیز بھی مستثنیٰ ہوں گی اور ان کے گارڈز کو ڈیوٹی اوقات کے دوران اسلحہ رکھنے کی اجازت ہوگی تاہم سیکیورٹی گارڈز گاڑیوں میں نقل وحرکت کے دوران اسلحہ کی نمائش نہیں کر سکیں گے۔
جاری نوٹیفکیشن میں کہا گیا ہے کہ رجسٹرڈ نجی سیکیورٹی کمپنیوں کے گارڈز کھلے مقامات، گشت یا ڈیوٹی کے دوران ہتھیاروں کی نمائش نہیں کریں گے اور اس دوران ان کا اسلحہ گاڑیوں کے اندر ہی رکھا جائے گا۔
نوٹیفکیشن میں یہ بھی ہدایت کی گئی ہے کہ دوران ڈیوٹی سیکیورٹی گارڈز یقینی بنائیں گے کہ عام لوگوں میں عدم تحفظ کا احساس پیدا نہ ہو۔
نوٹیفکیشن کے مطابق اس پابندی کی خلاف ورزی کرنے والے افراد کے خلاف متعلقہ تھانوں کے ایس ایچ اوز کو کارروائی کا اختیار ہوگا۔
