اسلام آباد: ملک بھر کے یوٹیلیٹی اسٹورز کے ملازمین پر ہڑتال، مظاہروں اور احتجاج پر پابندی کا اطلاق کردیا گیا۔
ذرائع کے مطابق وفاقی حکومت نے یوٹیلیٹی اسٹورز کارپوریشن میں چھ ماہ کیلئے لازمی سروس ایکٹ کا نفاذ کردیا، وفاقی کابینہ کی منظوری کے بعد لازمی سروس ایکٹ کا اطلاق فوری کیا گیا۔
ذرائع نے بتایا کہ فیصلے کا مقصد یوٹیلیٹی اسٹورز پر شہریوں کو اشیاء کی بلاتعطل فراہمی یقینی بنانا ہے، لازمی سروس ایکٹ کے تحت ہڑتال، مظاہروں اور احتجاج پر پابندی عائد کی گئی ہے۔
ذرائع نے بتایا کہ یوٹیلیٹی اسٹورز کارپوریشن یونیز کی سرگرمیوں پر بھی پابندی لگادی گئی، لازمی سروس ایکٹ کی خلاف ورزی کرنے والوں کے خلاف کارروائی ہوگی، ابتدائی طور پر اس ایکٹ کا نفاذ 6 ماہ کیلئے ہوگا جس میں توسیع بھی ہوسکتی ہے۔
