کراچی: گلستان جوہر میں مبینہ لوٹ مارکرنے والے ملزم کو عوام نے پکڑ لیا، مبینہ طور پر ڈاکو کار سوار فیملی سے لوٹ مار کررہا تھا۔

تفصیلات کے مطابق کار سوار فیملی سے لوٹ مار کرنے والے ڈاکو کو مشتعل شہریوں نے بدترین تشدد کا نشانہ بنایا جس کے باعث ملزم کی حالت تشویشناک ہے۔ زخمی ملزم کو فوری طبی امداد کیلئے اسپتال منتقل کردیا گیا ہے۔

ایس ایس پی ایسٹ نے بتایا کہ مبینہ ڈاکو کی گردن میں گولی لگی جس سے خون بہہ رہا تھا، ابتدائی طور پر کار سوار فیملی سے لوٹ مارکی اطلاع ملی۔

فرخ رضا کا کہنا تھا کہ بظاہرمعاملہ کچھ مشکوک بھی لگ رہا ہے۔ شدید زخمی شخص کے پاس ایک بیگ بھی ملا ہے۔

اس حوالے سے لٹنے والے شہری سمیرکا اپنے بیان میں کہنا تھا کہ گلستان جوہر میں فیملی کے ہمراہ خریداری کیلئے آیا تھا، ایک ملزم نے شیشہ بجاکر موبائل فون چھینا اور ساتھی کیساتھ فرارہونے لگا۔

لٹنے والے شہری سمیر نے بتایا کہ اپنے لائسنس یافتہ پستول سے ملزمان پرفائر کیا، گولی پیچھے بیٹھے ایک ملزم کی گردن میں لگی وہ زمین پرگرگیا جبکہ ملزم کے پاس ایک بیگ بھی موجود تھا۔