لاہور: بنگلادیش کے بولنگ کوچ مشتاق احمد نے کہا ہے کہ پاکستان کے خلاف سیریز میں ان کی ٹیم کم بیک کرے گی۔
بنگلادیش کے بولنگ کوچ مشتاق احمد نے پہلے ٹی 20 میچ میں پاکستان کے ہاتھوں شکست کے بعد پریس کانفرنس میں کہا کہ بنگلادیش سیریز میں کم بیک کرے گا، جیت کے لیے پاکستان ٹیم کو کریڈٹ دیتا ہوں۔
مشتاق احمد نے کہا پاکستان ٹیم نے جس طرح کی کرکٹ کھیلی اسے کریڈٹ جاتا ہے، شاداب خان نے لمبے عرصے بعد شان دار پرفارمنس دی ہے، آغا سلمان نے بھی بہت اچھا کھیلا، ان کی بیٹنگ پر فخر ہے۔
بولنگ کوچ کا کہنا تھا کہ 200 رنز کا تعاقب ہو تو 13 یا 14 رن ریٹ برقرار رکھنا مشکل ہوتا ہے، میچ شروع ہوتے ہی پچ سے بولرز کو مدد مل رہی تھی، دو تین چھکوں کے بعد وکٹ ملے تو مورال بلند ہوتا ہے۔
انھوں نے بنگلادیش کی مستقبل کی تیاریوں کے حوالے سے بتایا کہ ورلڈ کپ کے لیے بہترین کمبی نیشن بنانے پر غور ہو رہا ہے، نجم الحسن شانٹو کو آئندہ میچز میں چانس ملے گا۔
انھوں نے کہا ’’میں ایک سال سے بنگلادیش ٹیم کے ساتھ کام کر رہا ہوں، بنگلادیشی عوام پاکستان سے بہت محبت کرتے ہیں، پاکستان ٹیم کہیں بھی ہو، بنگلادیشی عوام سپورٹ کرتے ہیں۔‘‘
پاکستان نے بنگلا دیش کو پہلے ٹی 20 میں شکست دے دی
واضح رہے کہ گزشتہ روز بنگلادیش ہدف کے تعاقب میں ناکام رہا اور سیریز کا پہلا ٹی ٹوئنٹی پاکستان کے نام رہا، قذافی اسٹیڈیم میں پاکستان نے ٹاس جیت کر باری لی، اوپنر صائم اور فخر ابتدائی دو اوور میں آؤٹ ہوئے، تاہم کپتان سلمان اور حارث نے ٹیم کو مشکل سے نکالا۔ پاور پلے ختم ہوتے ہی حارث 31 پر وکٹ گنوا گئے، سلمان آغا نے کیریئر بیسٹ 56 رنز بنائے، حسن نواز نے 44 اور شاداب خان نے برق رفتار 48 رنز بنا کر ٹوٹل 200 کے پار پہنچا دیا۔
جواب میں بنگلادیشی بیٹرز نے اٹیک کی کوشش کی، تاہم حسن علی نے بیک ٹو بیک اوورز میں دونوں اوپنر آؤٹ کر دیے، بنگلادیشی کپتان لٹن داس اور توحید اسکور 100 تک لے گئے، کپتان کے آؤٹ ہوتے ہی بنگلادیشی بیٹنگ تاش کے پتوں کی طرح بکھر گئی، آخر میں جا کر علی نے کچھ مزاحمت کی مگر کام نہ آئی، بنگلادیشی ٹیم 164 پر آؤٹ ہو گئی۔
