بنگلادیشی کرکٹر تمیم اقبال کو صحت میں بہتری آنے پر اسپتال سے ڈسچارج کر دیا گیا۔
سابق کپتان تمیم اقبال میچ کے دوران دل کا دورہ پڑنے کے باعث چند دن اسپتال میں رہنے کے بعد گھر واپس پہنچ گئے ہیں۔
36 سالہ کو جمعہ کو اسپتال سے ڈسچارج کیا گیا۔ وہ پیر کو ڈھاکہ پریمیئر ڈویژن کرکٹ لیگ کے 50 اوور کے ایک میچ میں محمڈن اسپورٹنگ کلب کی قیادت کر رہے تھے جب انہیں سینے میں شدید درد کی شکایت پر قریبی اسپتال لے جایا گیا۔
جہاں ڈاکٹرز نے ان کی انجیوپلاسٹی کی اور اسٹنٹ ڈالنے کے بعد روبہ صحت ہونے پر گھر جانے کی اجازت دے دی۔
بنگلا دیشی وزارت صحت اور خاندانی بہبود کے ابو ظفر نے صحافیوں کو بتایا کہ یہ غیر یقینی ہے کہ آیا تمیم کرکٹ میں واپسی کر پائیں گے۔
انہوں نے کہا کہ تمیم اگلے تین ماہ تک کھیل نہیں کھیل سکیں گے اگر سب کچھ ٹھیک رہا تو وہ واپس آ سکیں گے۔
