ڈھاکا: مفسر قرآن اور نائب امیر جماعت اسلامی بنگلا دیش دلاور حسین سعیدی جیل میں انتقال کر گئے۔
تفصیلات کے مطابق جماعت اسلامی بنگلا دیش کے نائب امیر علامہ دلاور حسین سعیدی جیل کے اسپتال میں انتقال کر گئے، وہ گزشتہ 10 سال سے عمر قید کی سزا کاٹ رہے تھے۔
مفسرقرآن اور عالم دین دلاور حسین سعیدی کو گزشتہ رات دل کا دورہ پڑا، انھیں ڈھاکا کے پی جی اسپتال لے جایا گیا، لیکن وہ جاں بر نہ ہو سکے۔
71 کی جنگ میں وہ جامعہ علوم اسلامیہ کراچی میں زیر تعلیم تھے، وہ بین الاقوامی شہرت یافتہ مفسر اور متعدد کتابوں کے مصنف اور مشہور عالم دین تھے، ان کی مجالس میں لوگ بڑی تعداد میں شرکت کرتے تھے۔
1996 سے 2008 تک 3 مرتبہ الیکشن جیت کر بنگلا دیش کی پارلیمنٹ کے رکن بھی رہے، علامہ دلاور حسین سعیدی ورلڈ علما کونسل کے رکن بھی تھے، ان کے شاگردوں کی تعداد ہزاروں میں ہے۔
نام نہاد جنگی جرائم ٹریبونل نے انھیں 2013 میں سزائے موت سنائی تھی، جسے بعد میں عمر قید میں تبدیل کر دیا گیا تھا، قید میں ان کی المناک موت پر ہزاروں افراد سڑکوں پر نکل آئے اور شدید احتجاج کیا۔
