بنگلادیش کو اسکولوں اور دفاتر کے اوقات کم کرنے پڑ گئے

ڈھاکا: بنگلادیش میں توانائی بحران شدت اختیار کر گیا، ملک میں اسکولوں اور دفاتر کے اوقات کم کر دیے گئے۔

تفصیلات کے مطابق بنگلادیشی حکومت نے توانائی بحران پر قابو پانے کے لیے اسکول اور دفاتر کے اوقات کم کر دیے ہیں۔

بنگلادیش میں اب اسکول ہفتے میں 2 روز کے لیے بند رہیں گے، جب کہ حکومت نے دفاتر اور بینکوں میں کام کے اوقات میں بھی ایک گھنٹے کی کمی کر دی ہے۔

بنگلادیشی میڈیا کے مطابق سرکاری دفاتر اور بینک اپنے کام کے دنوں میں اوقات 8 کی بجائے 7 گھنٹے کر دیں گے۔

توانائی کی قیمتوں میں اضافے کے باعث مشکلات کا شکار بنگلادیش کی حکومت نے گزشتہ ماہ روزانہ 2 گھنٹے بجلی کی لوڈشیڈنگ کا بھی اعلان کیا تھا۔

بنگلادیشی حکومت نے روس یوکرین جنگ کے باعث عالمی منڈی میں توانائی کی بڑھتی قیمتوں کے وجہ سے گزشتہ ماہ اپنے تمام 10 ڈیزل پاور پلانٹس کو بھی بند کر دیا ہے۔

Comments