کراچی: ڈھاکا سے ریاض کے لیے سعودی ایئر کی پرواز کی کراچی میں ہنگامی لینڈنگ ہوئی ہے۔
تفصیلات کے مطابق بنگلادیش سے سعودی عرب جانے والی پرواز نے کراچی میں میڈیکل ایمرجنسی لینڈنگ کی ہے، سعودی ایئر کی پرواز ایس وی 805 نے صبح 7:30 بجے کراچی لینڈ کیا۔
ڈھاکا سے روانگی کے بعد بھارتی فضائی حدود میں مسافر کی طبیعت خراب ہوئی، جس پر کپتان نے ایئر ٹریفک کنٹرولر سے رابطہ کیا، کنٹرولر نے انسانی ہمدردی کی بنیاد پر طیارے کو کراچی میں لینڈنگ کی اجازت دے دی۔
کراچی ایئرپورٹ پر سول ایوی ایشن کی میڈیکل ٹیم نے ہنگامی اقدامات کیے، سعودی طیارے کے لینڈ کرتے ہی ڈاکٹرز فوری طور پر پہنچ گئے، معلوم ہوا کہ طیارے کے 44 سالہ بنگلادیشی مسافر ابو طاہر کا بلڈ پریشر دوران پرواز اچانک ہائی ہو گیا تھا، میڈیکل ٹیم نے طیارے میں سوار مسافر کا معائنہ کیا اور طبی امداد فراہم کی۔
مسافر کی طبیعت بہتر ہونے پر پرواز کراچی سے ریاض روانہ ہو گئی۔
