واشنگٹن: امریکا نے بنگلادیشی حکومت سے مطالبہ کیا ہے کہ وہ مظاہرین کو دیکھتے ہی گولی مارنے کا حکم واپس لے۔
امریکا نے بنگلادیش سے طلبہ مظاہرین کو دیکھتے ہی گولی مارنے کا حکم فوری واپس لینے کا مطالبہ کر دیا ہے۔ ترجمان امریکی محکمہ خارجہ میتھیو ملر نے نیوز کانفرنس میں بنگلادیش میں پُرتشدد واقعات پر تشویش کا اظہار کرتے ہوئے کہا کہ امریکا کو بنگلادیش میں موبائل فون اور انٹرنیٹ کی بندش پر گہری تشویش ہے۔
انھوں نے کہا ہم بنگلادیشی حکومت سے انٹرنیٹ سروس بحال کرنے کا مطالبہ کرتے ہیں، ترجمان نے پریس کانفرنس میں مظاہرین کو دیکھتے ہی گولی مارنے کے حکم کی شدید مذمت کی۔
بنگلادیش میں طلبہ نے ڈیجیٹل کریک ڈاؤن روکنے کے لیے حکومت کو 48 گھنٹے کا الٹی میٹم دے دیا
واضح رہے کہ بنگلادیش میں سرکاری ملازمتوں میں کوٹا سسٹم کے خلاف شروع ہونے والا احتجاج بدستور جاری ہے، طلبہ نے اب دیگر متعدد مطالبات کی منظوری کے لیے حکومت کو اب 48 گھنٹے کا الٹی میٹم دے دیا ہے۔
طلبہ نے پُرامن مظاہرین پر تشدد کے لیے وزیر اعظم حسینہ واجد سے معافی کا مطالبہ کیا، مظاہرین نے 500 سے زائد گرفتار افراد کی رہائی، جمعے سے نافذ کرفیو ہٹانے، انٹرنیٹ اور جامعات کھولنے کے بھی مطالبات کیے ہیں۔
