بنگلادیش میں کوٹہ سسٹم کے خلاف شدید احتجاج جاری ہے، پاکستانی دفترخارجہ نے وہاں موجود پاکستانی طلبہ کے حوالے سے بیان جاری کیا ہے۔
ڈھاکہ کی صورتحال پر پاکستانی طلبا کے حوالے سے ترجمان دفترخارجہ نے بیان جاری کرتے ہوئے بتایا کہ تمام پاکستانی طلبا محفوظ ہیں، ڈھاکہ میں ہمارامشن تمام طلبا سے رابطے میں ہے۔
ترجمان دفترخارجہ کا کہنا تھا کہ ڈپٹی ہیڈ آف مشن نے چٹاگانگ کا دورہ کیا اور طلبا سے بھی ملاقات کی ہے، بنگلادیش میں تمام پاکستانی طلبا محفوظ ہیں.
پاکستانی دفتر خارجہ نے کہا کہ ہائی کمیشن نے طلبا کو محفوظ مقامات پرجگہ دی ہے، محفوظ مقامات میں سفیر کی رہائش گاہ اور کچھ دیگر مقامات شامل ہیں۔
خیال رہے کہ بنگلہ دیش میں کوٹہ سسٹم کے خلاف طلبہ کا احتجاج خون ریز ہوچکا ہے جس کے باعث ملک بھر میں تمام تعلیمی اداروں کو غیر معینہ مدت کے لیے بند کر دیا گیا ہے۔
غیر ملکی میڈیا کے مطابق بنگلہ دیش میں سرکاری ملازمتوں پر کوٹے کے خلاف طلبہ کا احتجاج پورے مل میں پھیل چکا ہے، مختلف علاقوں میں پولیس اور طلبہ کے درمیان جھڑپوں میں متعدد طلبہ سمیت 100 سے زائد افراد ہلاک اور سیکڑوں زخمی ہوچکے ہیں۔
پرتشدد واقعات کے بعد حکومت نے احتجاج پر قابو پانے کے لیے ملک کے تمام تعلیمی اداروں کو غیر معینہ مدت کے لیے بند کر دیا ہے۔
