ڈھاکا: بنگلادیش کی حکومت نے کرکٹ بورڈ کو ٹیم پاکستان بھیجنے کی ہدایت کردی ہے۔
اے آر وائی نیوز کے مطابق بنگلادیش بورڈ پاکستان کے دورے سے متعلق حتمی اعلان کل کرے گا، کرکٹ بورڈ کھلاڑیوں سے رابطہ کرکے رائے لے رہا ہے۔
پاکستان کرکٹ بورڈ دورے کا نیا شیڈول بنگلادیشی بورڈ کو بھیج چکا ہے۔
پاکستان اور بنگلادیش کے درمیان 5 ٹی 20 میچوں کی سیریز 27 نومبر سے شروع ہونے کا امکان ہے۔
واضح رہے کہ گزشتہ دنوں بنگلادیش کرکٹ بورڈ کو دورہ پاکستان کے لیے گرین سگنل ملا تھا۔
یہ پڑھیں: بنگلادیش بورڈ کو دورہ پاکستان کے لیے گرین سگنل مل گیا
بی سی بی کے ایک اہلکار نے کھیلوں کی بین الاقوامی ویب سائٹ کو بتایا تھا کہ ‘ہمیں (حکومت کی طرف سے) گرین سگنل مل گیا ہے حالانکہ ہمیں ابھی تک آفیشل لیٹر موصول ہونا ہے جس کی ہمیں توقع ہے لیکن جہاں تک میں جانتا ہوں حکومت نے اصولی طور پر فیصلہ کیا ہے کہ وہ ہمیں آنے والے دورے کے لیے پاکستان کا دورہ کرنے دیں گے’۔
اہلکار کا کہنا تھا کہ حکومت کی طرف سے آفیشل لیٹر ملنے کے بعد ہم اپنے کھلاڑیوں سے بات کرنا شروع کر دیں گے کیونکہ ہمیں معلوم ہوا ہے کہ ان میں سے کچھ سیکورٹی وجوہات کی بناء پر سفر کرنے سے گریزاں ہیں۔
واضح رہے کہ گزشتہ روز بی سی بی نے کہا تھا کہ وہ حکومت کی طرف سے کلیئرنس کا انتظار کر رہا ہے اور پھر پاکستان کا سفر کرنے سے پہلے کھلاڑیوں سے بات چیت کرے گا۔
