ڈھاکہ: بنگلہ دیش میں مقیم لاکھوں روہنگیاں مہاجرین میں سے ایک لاکھ مہاجرین کو نئے کیمپوں میں منتقل کیا جائے گا۔
تفصیلات کے مطابق بنگلہ دیش میں واقع بھاشن چار نامی ایک جزیرے پر ایک لاکھ روہنگیا مسلمانوں کے لیے نئے کیمپ قائم کیے گئے ہیں۔
غیر ملکی خبر رساں ادارے کے مطابق ڈھاکہ حکام کی جانب سے ايک لاکھ روہنگيا مہاجرين کو مذکورہ جزيرے پر منتقل کيے جانے کا عمل کل سے شروع ہو رہا ہے۔
بنگلہ دیش کی وزیراعظم شيخ حسينہ رواں سال 3 اکتوبر کو خلیج بنگال ميں واقع بھاشن چار نامی جزيرے پر نئے قائم کردہ مہاجر کيمپوں کا باقاعدہ افتتاح کریں گی۔
روہنگیا مسلمانوں کی واپسی کے لیے بنگلادیش حکام کا عالمی برادری پر دباؤ
حکام کے مطابق ابتدائی مرحلے ميں پچاس سے ساٹھ خاندانوں کو وہاں آباد کيا جائے گا، بعد ازاں تعداد میں اضافہ کیا جائے گا۔
خبر رساں ایجنسی نے گذشتہ ہفتے کہا تھا کہ بنگلہ دیش حکام نے عالمی برادری پر دباؤ ڈالا ہے تاکہ وہ مہاجرین کی میانمار واپسی کے لیے اقدامات کرے۔
یاد رہے گذشتہ ہفتے ہی اقوام متحدہ نے میانمارکی فوج کو روہنگیا مسلمانوں کے قتل عام اور اجتماعی زیادتی میں ملوث قرار دے کر میانمار کے آرمی چیف اور پانچ جنرلز سمیت اعلیٰ فوجی قیادت پر مقدمہ چلانے کی سفارش کی تھی۔
تاہم میانمار کی حکومت نے اقوام متحدہ کی رپورٹ مسترد کرتے ہوئے الزامات کو بے بنیاد قرار دیا تھا۔
واضح رہے کہ میانمار کی مغربی ریاست راکھین سے گزشتہ برس اگست کے مہینے میں ملکی فوج کے کریک ڈاؤن کے بعد تقریباً سات لاکھ روہنگیا باشندے اپنی جانیں بچا کر بنگلہ دیش میں پناہ گزین ہوگئے تھے۔
