ڈھاکا: بنگلا دیش نے بھارت سے 300 الیکٹرک ڈبل ڈیکر ایئر کنڈیشنڈ بسیں خریدنے کے منصوبے کا اعلان کیا ہے۔

تفصیلات کے مطابق بنگلادیش نے بھارت سے الیکٹرک ڈبل ڈیکر بسوں کی درخواست کر دی ہے، رواں سال بنگلا دیش بھارت سے 100 الیکٹرک بسیں خریدے گا۔

میڈیا رپورٹس کے مطابق بنگلا دیشی حکومت کی جانب سے یہ درخواست اتوار کو ڈھاکا میں بھارت کے ڈپٹی ہائی کمشنر ڈاکٹر بنوئے جوگرے اور بنگلا دیش کے روڈ ٹرانسپورٹ اور پلوں کے وزیر عبید القادر کے درمیان ان کے دفتر میں ملاقات کے دوران کی گئی۔

بھارتی ڈبل ڈیکر بسیں ڈھاکا اور چٹوگرام کی سڑکوں پر چلائی جائیں گی، سرکاری پریس ریلیز میں کہا گیا ہے کہ وزیر ٹرانسپورٹ نے انڈین لائن آف کریڈٹ (LOC) کے تحت بنگلا دیش روڈ ٹرانسپورٹ کارپوریشن (BRTC) کے لیے 300 الیکٹرک ڈبل ڈیکر اے سی بسوں کی خریداری پر گفتگو کی ہے۔

بنگلادیش 2030 تک کاربن کے اخراج کو کم کرنے کے لیے ملک میں الیکٹرک گاڑیوں کی رجسٹریشن پر ایک پالیسی بنانے کے لیے کام کر رہا ہے، یہ پالیسی رواں ماہ منظوری کے لیے کابینہ کو بھیجی جائے گی۔