بنگلہ دیشی اداکارہ نصرت فاریہ کو ڈھاکہ کے حضرت شاہ جلال انٹرنیشنل ایئرپورٹ پر امیگریشن پولیس نے قتل کے الزام میں گرفتار کرلیا۔
غیرملکی میڈیا رپورٹس کے مطابق بنگلہ دیشی اداکار نصرت فاریہ جنھوں نے شیخ مجیب الرحمٰن کی بایوپک مجیب: دی میکنگ آف اے نیشن میں معزول وزیر اعظم شیخ حسینہ کا کردار ادا کرنے کے بعد شہرت حاصل کی تھی، اتوار کے روز انھیں ڈھاکہ کے ہوائی اڈے پر حراست میں لیا گیا۔
رپورٹ میں مزید کہا گیا کہ نصرت فاریہ کے خلاف دارالحکومت کے وتارا پولیس اسٹیشن میں درج مقدمے میں وارنٹ گرفتاری جاری کیے گئے تھے، ان پر جولائی کی بغاوت کے دوران قتل کی کوشش کا الزام تھا۔
اسسٹنٹ کمشنر پولیس شفیق الاسلام نے تصدیق کی کہ نصرت فاریہ کو گرفتار کر کے پولیس اسٹیشن لایا گیا ہے، بعد میں انھیں ڈھاکہ میٹروپولیٹن ڈیٹیکٹیو برانچ کے دفتر منتقل کیا گیا۔
نصرف فاریہ نے ریڈیو جوکی اور پریزینٹر کے طور پر اپنے کیریئر کا آغازکیا تھا، 2015 میں انھوں نے فلموں میں اداکاری شروع کی، بعد میں نصرت نے بنگلہ دیش اور بھارت میں متعدد پروجیکٹس میں کام کیا۔ اداکاری کے علاوہ وہ ماڈلنگ اور ہوسٹنگ میں بھی سرگرم ہیں۔
انھوں نے 2023 کی فلم ‘مجیب: دی میکنگ آف اے نیشن’ میں شیخ حسینہ کا کردار ادا کیا، جس کی ہدایت کاری آنجہانی ہدایت کار شیام بینیگل نے انجام دی تھی، یہ فلم بنگلہ دیش اور بھارت کی مشترکہ پروڈکشن تھی۔
