کراچی : نجی بینک کے لاکر سے لاکھوں روپے مالیت کا سونا پراسرار طور پر غائب ہوگیا، متاثرہ شہری نے زیورات کی برآمدگی کیلئے ایف آئی اے کو درخواست دے دی۔
تفصیلات کے مطابق کراچی کے علاقے خالد بن ولید روڈ پر قائم نجی بینک میں چوری کی انوکھی واردات سامنے آئی ہے، نہ ڈکیتی کی کوئی واردات ہوئی اور نہ ہی چوری کا کوئی واقعہ رپورٹ ہوا پھر بھی شہری کے لاکر سے سونا غائب ہوگیا، متاثرہ شہری نے سونے کی برآمدگی کیلیے ایف آئی اے کمرشل بینکنگ سرکل کو درخواست دے دی۔
اے آر وائی نیوز کے نمائندے سلمان لودھی کی رپورٹ کے مطابق متاثرہ شہری نے اپنی درخواست میں مؤقف اختیار کیا ہے کہ میرے لاکر سے70تولہ سے زائد سونا غائب ہے، سونے کی مالیت50لاکھ روپے سے زائد بنتی ہے۔
متاثرہ شہری کا مزید کہنا ہے کہ5سال بعد لاکرز دیکھنے گیا تو لاکر سے سونا غائب تھا، صرف چند زیورات موجود تھے، اس کا کہنا تھا کہ فیروز آباد پولیس اسٹیشن میں واقعے کا مقدمہ درج کرادیا ہے تاہم تفتیشی پولیس کے اقدامات سے مطمئن نہیں ہوں، نوٹس لے کر معاملہ کو حل کیا جائے۔
مزید پڑھیں: کراچی ، بینک کا سیکیورٹی گارڈ ہی لاکرز کا صفایا کرگیا، لاکھوں روپے لوٹ کر فرار
واضح رہے کہ رواں سال جنوری میں ڈیفنس کے نجی بینک میں مسلسل نائٹ ڈیوٹی کرنے والے سیکیورٹی گارڈ نے دوران ڈیوٹی بینک کے لاکرز توڑ کر ان کا صفایا کردیا، ملزم 65 لاکھ سے زائد رقم لے کر ساتھیوں سمیت فرار ہوگیا۔ گارڈ لاکرز کاٹنے کیلئے کٹر ساتھ لایا تھا۔
