اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے اڈیالہ جیل میں قید بانی چیئرمین کے ساتھ ڈیل کی خبروں پر خاموشی توڑ دی۔
پارلیمنٹ کے باہر میڈیا سے گفتگو میں بیرسٹر گوہر نے کہا کہ عمران خان کی اندر کی بات کو باہر شیئرنہیں کیا، ان کے بچے حالات سے باخبر ہیں اور انہوں نے بھی کہہ دیا ہے کہ کوئی ڈیل نہیں کی گئی۔
بیرسٹر گوہر نے کہا کہ عمران خان کے ساتھ کسی بھی قسم کی ڈیل کی تردید کرتا ہوں، سیاسی معاملات کا حل ڈائیلاگ سے ہی ہونا چاہیے۔
یہ بھی پڑھیں: بانی پی ٹی آئی نے کہا ہے ملک کی خاطر بات چیت کیلیے تیار ہوں، علی امین گنڈاپور
قبل ازیں، بیرسٹر علی ظفر نے اسلام آباد ہائیکورٹ میں میڈیا سے گفتگو میں کہا کہ بیرسٹر گوہر کی عمران خان سے ملاقات ہوئی، بانی پی ٹی آئی کے حوالے سے خبر آئی کہ مذاکرات کیے جائیں لیکن بیرسٹر گوہر نے اس خبر کی تصدیق یا تردید نہیں کی۔
بیرسٹر علی ظفر نے کہا کہ چیئرمین پی ٹی آئی نے کہا ہے کہ عمران خان سے ہوئی بات چیت خفیہ ہے، اس حوالے سے ہماری کور کمیٹی میٹنگ بھی نہیں ہوئی، بانی پی ٹی آئی تو کہتے رہے ہیں کہ حکومت کے پاس اختیار نہیں، موجودہ حالات میں ہم نے بتایا کہ پاکستان کیلیے متحد ہیں۔
انہوں نے بتایا کہ اگر بانی پی ٹی آئی نے ہدایت کی ہے تو مذاکرات ہوں گے۔
دوسری جانب پی ٹی آئی وکیل نعیم حیدر پنجوتھا نے میڈیا سے گفتگو میں کہا کہ عمران خان نے کبھی نہیں کہا کہ شہباز شریف سے مذاکرات کرائیں۔
نعیم حیدر پنجوتھا نے کہا کہ مودی صرف بانی پی ٹی آئی سے خطرہ محسوس کرتا ہے، مودی دوبارہ بھی حملہ کر سکتا ہے بانی کی پے رول پر رہائی ہونی چاہیے۔
پی ٹی آئی رہنما جنید اکبر نے پارلیمنٹ ہاؤس کے باہر میڈیا سے گفتگو میں کہا کہ ملک کی ترقی کیلیے ضروری ہے کہ سب ایک پیج پر ہوں، ملک پر برا وقت آیا تو ہم سب اپنے اداروں کے ساتھ کھڑے ہوئے، ہمارے خلاف دہشتگردی کی ایف آئی آر کاٹی گئی لیکن ملک کے ساتھ کھڑے ہوئے۔
جنید اکبر نے کہا کہ استعفے کے حوالے سے پیغام غلط طریقے سے باہر آیا، بانی پی ٹی آئی نے کہا تھا کہ اگر آپ دو کام اکٹھے نہیں کر سکتے تو ایک ذمہ داری چھوڑ دیں۔
