سرکاری ذرائع نے کہا ہے کہ بیرسٹر گوہر بانی پی ٹی آئی کیلئے پیغام لےکر اڈیالہ جیل پہنچ گئے، سنگجانی میں دھرنا دینے کا کہا گیا ہے۔
تفصیلات کے مطابق سرکاری ذرائع کا کہنا ہے کہ پاکستان تحریک انصاف کو کہا گیا ہے کہ پشاور موڑ نہیں سنگجانی میں احتجاج یا دھرنا دیں، پیغام دیا گیا ہے کہ اسیران کی رہائی کیلئے کمیٹی تشکیل دی جاسکتی ہے۔
سرکاری ذرائع نے بتایا کہ پیغام دیا گیا ہے کہ پی ٹی آئی نہیں مانتی تو مجمع میں ٹارگٹڈ آپریشن کیا جائیگا، پی ٹی آئی کے مجمع میں اشتہاری اور افغان دہشت گرد موجود ہیں۔
دریں اثنا وفاقی وزیر داخلہ محسن نقوی نے کہا ہے کہ پاکستان تحریک انصاف سے کسی قسم کے کوئی مذاکرات نہیں ہورہے۔
اسلام آباد میں میڈیا نمائندوں سے گفتگو کرتے ہوئے ان کا کہنا تھا کہ جو بھی ڈی چوک پہنچے گا اس کیخلاف قانونی کارروائی ہوگی، انھوں نے واضح الفاظ میں کہا کہ منسٹر انکلیو میں میری کسی سے کوئی ملاقات نہیں ہوئی۔
