اسلام آباد : پاکستان تحریک انصاف ( پی ٹی آئی) کے چیئرمین بیرسٹر گوہر نے احتجاج میں کسی مسلح شخص کی موجودگی کی تردید کرتے ہوئے کہا بہت ہوگیا اب نو مئی کی دھول بیٹھنی چاہیے۔
تفصیلات کے مطابق پاکستان تحریک انصاف ( پی ٹی آئی) کے چیئرمین بیرسٹرگوہر نے قومی اسمبلی اجلاس میں اظہار خیال کرتے ہوئے کہا کہ بہت ہوگیا 9 مئی کی دھول اب بیٹھنی چاہیے، ہمارا مطالبہ ہے کہ جو 9 مئی کے ذمہ داران ہیں، ان کو انصاف کے کٹہرے میں لایا جائے۔
چیئرمین پی ٹی آئی کا کہنا تھا کہ پی ٹی آئی احتجاج کے لیے جو لوگ اسلام آباد آئے وہ پرامن لوگ تھے، اس بات کی تردید کرتا ہوں کہ احتجاج کیلئےجولوگ اسلام آباد آئے کسی کے پاس اسلحہ نہیں تھا۔
انھوں نے کہا کہ ہم اس ایوان سے انصاف لینا چاہتے ہیں ، ہمیں دوبارہ سڑکوں پرآنے کیلئے مجبور نہ کیا جائے۔
ان کا کہنا تھا کہ بانی پی ٹی آئی کے ووٹرز،سپورٹرزعام پاکستانی ہیں، ہمارے ووٹرز اور سپورٹرز میں کوئی گوریلافورس نہیں۔
پاکستان تحریک انصاف کے چیئرمین نے کہا کہ بھٹو ریفرنس میں 45سال بعد سپریم کورٹ نے تسلیم کیا کہ ذوالفقار بھٹو کو انصاف نہیں ملا، اب وقت ہے ہم بھی مطالبہ کرتے ہیں کہ ہمیں انصاف دیا جائے۔
