پشاور: مشیر خیبر پختونخوا حکومت بیرسٹر سیف کا کہنا ہے کہ صوبے میں کوئی جعلی حکومت نہیں ہے جسے کوئی آسانی سے گرا سکے۔
بیرسٹر سیف نے اپنے بیان میں کہا کہ کے پی حکومت کو گرانے کا خواب کبھی شرمندہ تعبیر نہیں ہوگا، خیبر پختونخوا میں حقیقی عوامی نمائندہ حکومت موجود ہے۔
انہوں نے کہا کہ وزیر اعلیٰ علی امین گنڈاپور کی قیادت میں تمام پی ایز متحد ہیں اور ان پر پورا اعتماد ہے، صوبے کا ہر ایم پی اے بانی پی ٹی آئی عمران خان کا سپاہی ہے۔
یہ بھی پڑھیں: گورنر کونسلر کا الیکشن نہیں جیت سکتا، ہماری حکومت کیا گرائے گا؟ گنڈاپور
ان کا کہنا تھا کہ علی امین گنڈاپور کو بانی پی ٹی آئی عمران خان کا پورا اعتماد حاصل ہے، گزشتہ 12 برسوں سے عوام نے اپوزیشن جماعتوں کو بارہا مسترد کیا اب اپوزیشن سازشوں کے ذریعے عوام پر مسلط ہونے کا خواب دیکھ رہی ہے۔
بیرسٹر سیف نے مزید کہا کہ خیبر پختونخوا میں پی ٹی آئی کے سوا باقی تمام پارٹیاں ختم شد ہیں، سازشیں کرنے والے خوش فہمی میں مبتلا ہیں، بطور مال غنیمت کچھ نشستیں ملنے کے باوجود اپوزیشن کی خواہشیں ادھوری رہیں گی۔
دو روز قن؛ وزیر اعلیٰ علی امین گنڈاپور نے اپنے بیان میں تھا کہ ہامری حکومت کو آئینی طریقہ سے نہیں گرایا جا سکتا صوبے میں گورنر راج لگانا ہے تو لگا کر دیکھ لیں۔
علی امین گنڈاپور نے کہا تھا کہ پہلے عام انتخابات میں ہمارا مینڈیٹ چوری کیا گیا اور پھر 26ویں آئینی ترمیم کے ذریعہ عدلیہ پر حملہ کیا گیا، آئینی طریقے سے کے پی حکومت کو نہیں گرایا جا سکتا۔
ان کا کہنا تھا کہ چیلنج کرتا ہوں اگر ہماری حکومت کو گرایا تو سیاست چھوڑ دوں گا، اگر صوبے میں گورنر راج لگانا ہے تو یہ شوق بھی پورا کر کے دیکھ لیں، کسی کو تحریک عدم اعتماد لانے کا شوق ہے تو وہ بھی آزما کر دیکھ لے۔
