پشاور : خیبرپختونخوا کے مشیر اطلاعات بیرسٹر سیف نے القادر ٹرسٹ کیس کے فیصلے کے حوالے سے کہا کہ امید ہے آج فیصلہ مزید مؤخر نہیں ہوگا۔
تفصیلات کے مطابق خیبرپختونخوا کے مشیر اطلاعات بیرسٹر سیف نے اپنے بیان میں کہا ہے کہ امید ہے کہ آج القادر کیس کا فیصلہ مزید مؤخر نہیں ہوگا، 3 بار فیصلہ مؤخر ہونے سے پہلے ہی شکوک و شبہات نے جنم لے لیا ہے۔
صوبائی مشیر اطلاعات کا کہنا تھا کہ انصاف میں تاخیر، انصاف سے انکار کے مترادف ہے، بیرسٹر سیفالقادر ٹرسٹ کیس جعلی حکومت کا جعلی مقدمہ ہے، کیس میں پیسہ بیرون ملک سے آیا اوراسے ریاست کے فلاحی منصوبے پر خرچ کیا گیا۔
انھوں نے کہا کہ نوجوانوں کوسیرت النبیﷺسےروشناس کرانے پرحکومت سزادینےکی کوشش کر رہی ہے، اگر نوجوانوں کو سیرت النبیﷺسے روشناس کرانا جرم ہےتو یہ جرم بانی کرتا رہے گا۔
مزید پڑھیں : بانی پی ٹی آئی اور بشریٰ بی بی کے خلاف 190 ملین پاؤنڈ کیس کا فیصلہ آج ہوگا
صوبائی مشیر کا کہنا تھا کہ بانی یا بشریٰ بی بی کے اکاؤنٹ میں کوئی رقم منتقل نہیں ہوئی، بانی کے خلاف تمام جعلی مقدمات کی حقیقت عدالتوں میں بے نقاب ہو رہی ہے، جعلی حکومت نے ملک میں لاقانونیت کے نئے ریکارڈ قائم کیے ہیں۔
خیال رہے بانی پی ٹی آئی اور بشریٰ بی بی کے خلاف ایک سو نوے ملین پاؤنڈ ریفرنس فیصلہ آج سنایا جائے گا۔
اس ریفرنس کا فیصلہ تین مرتبہ مؤخر کیا جاچکا ہے، احتساب عدالت نے فیصلہ اٹھارہ دسمبر دوہزار چوبیس کو محفوظ کیا تھا۔ فیصلہ سنانے کیلئے پہلے تئیس دسمبر پھر چھے جنوری اور اس کے بعد تیرہ جنوری کی تاریخ دی گئی۔
