پشاور : خیبرپختونخوا کے مشیر اطلاعات بیرسٹر سیف کا کہنا ہے کہ عالمی منڈی کے مطابق پاکستان میں پٹرول 100 روپے سے بھی کم کا ہونا چاہیے۔
تفصیلات کے مطابق خیبرپختونخوا کے مشیر اطلاعات بیرسٹر سیف نے اپنے بیان میں کہا کہ پی ٹی آئی دورحکومت میں دہشت گردی ختم ہو چکی تھی لیکن حکومت تبدیلی کے بعد بے تحاشا مہنگائی نے عوام کی کمر توڑ دی ہے۔
ترجمان کا کہنا تھا کہ حکومت تبدیلی کے بعد 15 روپے فی یونٹ بجلی 40 سے50روپےتک جا پہنچی اور اب صرف 7 روپے کم کر کے قوم پر احسان جتایا جا رہا ہے۔
انھوں نے کہا کہ 150 روپے فی لیٹر پیٹرول اب 260 روپے پر پہنچ گیا، اشیائے خوردونوش کی قیمتیں بھی آسمان سے باتیں کررہی ہیں۔
صوبائی مشیر اطلاعات کا کہنا تھا کہ بانی پی ٹی آئی کی قیادت میں ملک ترقی کی راہ پر گامزن تھا، عالمی منڈی میں خام تیل کی قیمتیں،پی ٹی آئی کے دور سے بھی کم ہو چکی ہیں، عالمی منڈی کےمطابق پاکستان میں پٹرول 100 روپے سے بھی کم کا ہونا چاہیے۔
خیال رہے بین الاقوامی منڈی میں خام تیل کی قیمت میں آج بھی کمی ریکارڈ کی گئی، لندن برینٹ خام تیل کی قیمت دو ڈالر پندرہ سینٹ سستا ہوگیا اور فی بیرل قیمت تریسٹھ ڈالر تینتیس سینٹ ہوگئی جبکہ ویسٹ ٹیکساس خام تیل دو ڈالر اٹھائیس سینٹ کم ہو ساٹھ ڈالر سات سینٹ فی بیرل پرآگیا۔
