پشاور: وزیراعلیٰ خیبرپختونخوا کے مشیر برائے اطلاعات بیرسٹر سیف نے خبردار کیا ہے کہ جولائی میں پیٹرولیم مصنوعات کی قیمتوں میں مزید اضافہ ہوگا اور پیٹرول کی قیمتیں آسمان سے باتیں کریں گی۔
تفصیلات کے مطابق وزیراعلیٰ خیبرپختونخوا کے مشیر برائے اطلاعات بیرسٹرمحمد علی سیف نے حکومت پر کڑی تنقید کرتے ہوئے کہا کہ وفاقی حکومت نےنئے مالی سال سے قبل عوام پرپیٹرول بم گرا دیا، جولائی میں پیٹرولیم مصنوعات کی قیمتوں میں مزید اضافہ ہوگا۔
مشیر برائے اطلاعات کا کہنا تھا کہ بجٹ میں پیٹرول پرڈھائی فیصد نیا ٹیکس عائد کیا گیا، پیٹرول کی قیمتیں آسمان سےباتیں کریں گی اور پیٹرول مہنگا ہونے سے اشیائے خورونوش بھی مہنگی ہو جائیں گی۔
انھوں نے پنجاب حکومت پر بھی تنقید کرتے ہوئے کہا کہ وفاقی بجٹ غریب دشمن اورامیر دوست ہے اور پنجاب حکومت کا بجٹ بھی عوام دشمن ہے، پنجاب کے بجٹ میں زرعی شعبہ مکمل نظرانداز کیا گیا، متاثرہ کسانوں کوریلیف نہ دیناافسوسناک ہے۔
مزید پڑھیں : پیٹرولیم مصنوعات کی قیمتوں میں اضافہ
صوبائی مشیر نے بتایا کہ حکومت کی پالیسیوں سے کسانوں کو 2200 ارب کا نقصان برداشت کرنا پڑا، پنجاب میں صرف کمیشن والے منصوبوں کو ترجیح دی گئی، پنجاب حکومت صحت کی مفت سہولتیں دینے میں ناکام رہی۔
ان کا مزید کہنا تھا کہ خیبرپختونخوا پنجاب کو صحت سہولیات میں مدد دینے کو تیارہے، وزیراعلیٰ کی قیادت میں فلاحی کاموں کوترجیح دی جا رہی ہے۔
